Dars bo’lmagan davrda ham o’qituvchilar maktabda faoliyat yuritishi zarur

Ko'plab o'qituvchilarni qiziqtirayotgan savol: maktablarda ta'til bo'lgan vaqtda ham o'qituvchi ishga chiqishi kerakmi? Qonunchilik bu savolga aniq javob beradi — ha, zarur.

Qonuniy asoslar

O'zbekiston Respublikasi Mehnat kodeksining 114-moddasiga muvofiq, xodim ish tartibi yoki grafigiga yoxud mehnat shartnomasi shartlariga muvofiq o'z mehnat vazifalarini bajarishi lozim bo'lgan vaqt ish vaqti hisoblanadi.

Mehnat kodeksining 125-moddasida ish beruvchi xodimning ishlagan vaqtini hisoblab borishi shartligi belgilangan. Ish beruvchi xodimga bajargan ishi uchun haq to'laydi (Mehnat kodeksining 154-moddasi).

Pedagog ish rejasi qanday shakllantiriladi?

Qonunchilikka ko'ra, umumiy o'rta ta'lim muassasalari pedagog xodimlari o'z faoliyatini namunaviy yillik ish reja asosida amalga oshiradilar. Pedagog ish rejasi ikki yo'nalishdagi tadbirlar majmuasidan iborat:

• o'quv-tarbiya jarayoniga oid;
• o'quv-tarbiya jarayonining metodik ta'minoti va tashkiliy-pedagogik jarayonga oid.

Yillik ish rejada nimalar nazarda tutiladi?

O'quv-tarbiya jarayonining metodik ta'minoti va tashkiliy-pedagogik jarayonga oid yillik ish rejada har bir pedagog xodimning lavozim majburiyatlari hamda u bilan tuzilgan mehnat shartnomasida belgilangan vazifalar bilan bir qatorda quyidagilar nazarda tutiladi:

• o'quvchilarni barkamol va ma'naviy yetuk inson etib tarbiyalash maqsadida ularning qobiliyat va iste'dodlarini rivojlantirish;
• fanlarni o'zlashtirishda qiyinalayotgan va iqtidorli o'quvchilar bilan alohida mashg'ulotlar o'tkazish;
• pedagog xodimning o'z ustida mustaqil ishlashi.

O'quv-tarbiya jarayonining metodik ta'minoti va tashkiliy-pedagogik jarayon umumiy o'rta ta'lim muassasasida olib borilishini inobatga olgan holda, maktabda dars bo'lmagan davrda ham o'qituvchilar maktabda faoliyat yuritishi zarur.

Bu mavzuda avvalroq ta'til davrida o'qituvchilarning maktabda ishlashi haqida batafsil yozgan edik. InfoEdu.uz o'qituvchilar huquqlari va majburiyatlari bo'yicha yangiliklarni yoritishda davom etadi.