Maktab maslahatchisiga 10 soatgacha dars yuklamasi berilmaydi

Maktabgacha va maktab ta'limi vazirligi maktab maslahatchisiga dars soatlari ajratilishi mumkinmi degan masala yuzasidan rasmiy tushuntirish berdi. Vazirlikning 2026-yil 28-avgustdagi 03-14-4314-sonli xatida qayd etilishicha, maktab maslahatchisiga Vazirlar Mahkamasining 2005-yil 21-dekabrdagi 275-son qarori asosida haftasiga 10 soatgacha o'qituvchi lavozimini qo'shib olib borish, ya'ni shu tartibda o'quv yuklamasi yuritilishiga yo'l qo'yilmaydi.

Lavozimning huquqiy maqomi

• Maktab maslahatchisi lavozimi Prezidentning 2025-yil 8-sentabrdagi PQ-277-son qarori asosida umumiy o'rta ta'lim tashkilotlarida “Kelajak” markazlarining vertikal tizimini joriy etish hamda o'quvchilar tashabbuslarini qo'llab-quvvatlash maqsadida joriy qilingan;
• Lavozim vazifalariga o'quvchilarning yetakchilik, ijodiy va tashabbuskorlik qobiliyatlarini rivojlantirish, ularni ijtimoiy va ekologik loyihalar hamda to'garaklarga jalb etish ishlarini muvofiqlashtirish kiradi;
• Vazirlikning 2025-yil 30-sentabrdagi 368-son buyrug'i 5-ilovasiga ko'ra, maktab maslahatchisi uchun oliy, bakalavr darajasidagi ma'lumot hamda pedagogika yoki psixologiya yo'nalishidagi mutaxassislik talab etiladi.

Rahbar xodimlar ta'rifi

Tushuntirishda Vazirlar Mahkamasining 2024-yil 20-dekabrdagi 867-son qarori 1-ilovasidagi Nizomning 2-bandi hamda 2024-yil 6-maydagi 263-son qarori ilovasi bilan tasdiqlangan Nizomning 2-bandi keltirilgan. Ularda rahbar xodimlar va rahbar kadrlar tushunchalariga ta'rif berilgan. Vazirlik shu asosda maktab maslahatchisiga 275-son qaror tartibida haftasiga 10 soatgacha o'quv yuklamasi biriktirilishi mumkin emasligini qayd etgan.

Vakant soatlar uchun alohida shartnoma

Shu bilan birga, vazirlik xatida pedagogika yo'nalishini tamomlagan oliy ma'lumotli maktab maslahatchisi bilan, agar maktabda vakant dars soatlari mavjud bo'lsa, tegishli fan mutaxassisligi bo'yicha o'quv mashg'ulotlarini o'tkazganlik uchun soatbay haq to'lash tartibida alohida mehnat shartnomasi tuzish mumkinligi eslatib o'tilgan.

Ya'ni bu yerda ikki xil holat farqlanadi: maktab maslahatchisi lavozimini o'qituvchilik lavozimi bilan qo'shib olib borish — bir tartib, vakant dars soatlari bo'yicha alohida mehnat shartnomasi asosida soatbay haq olish — boshqa tartib.

Maktab maslahatchisi lavozimiga ariza topshirish va ishga qabul qilish tartibi haqida maslahatchini ishga olish tartibi bo'yicha ham yozgan edik.