15-sentabr kuni Oliy Majlis Qonunchilik palatasida 2026-yilning birinchi yarim yilligida davlat budjeti ijrosi to'g'risidagi hisobot muhokama qilindi. Unda ta'limga yo'naltirilgan mablag'lar, maktab va bog'chalarda yaratilayotgan sharoitlar hamda pedagoglar sifati masalalari ko'tarildi.
Ta'limga yo'naltirilgan mablag'lar
Yilning dastlabki olti oyida ta'lim sohasiga 49,5 trillion so'm mablag' ajratilgan. Qonunchilik palatasidagi muhokamada deputat Dilnoza Azizova mablag'larning ko'payishi va yangi maktab hamda bog'chalar qurilayotganini ijobiy holat deb baholadi, biroq ta'limda faqat moddiy sharoitlarni yaxshilash bilan cheklanib qolmaslik kerakligini ta'kidladi.
Reklama
Uning fikricha, ta'lim sifati uchun maktab binolari bilan bir qatorda pedagoglarning bilimi, kasbiy mahorati, mas'uliyati va bolalar bilan ishlash qobiliyati ham muhim. Deputat vazirlikdan ajratilgan mablag'lar ta'lim sifati nuqtai nazaridan qanday natija berayotganini baholash mezonlari haqida so'radi.
Sifatni baholash uchun 36 ta indikator
Maktabgacha va maktab ta'limi vaziri o'rinbosari Temurjon Komilovning ma'lum qilishicha, budjet mablag'laridan foydalanish samaradorligini baholash uchun 6 ta budjet dasturi va 36 ta maqsadli indikator belgilangan. Ushbu ko'rsatkichlar:
- Ta'lim sifatini;
- Pedagoglarning malakasini;
- Bitiruvchilarning oliy ta'limga kirish ko'rsatkichlarini;
- O'qituvchilarning sifat tarkibidagi o'zgarishlarni qamrab oladi.
Vazirlik vakili bu ko'rsatkichlar natijalari parlamentning tegishli qo'mitalari bilan muntazam muhokama qilinishini bildirdi.
Bitiruvchilar va o'qituvchilar natijalari
- 2026-yilda qariyb 450 ming nafar bitiruvchining o'rtacha bali 91,6 ni tashkil qilgan — o'tgan yilga nisbatan 11,6 ball yuqori;
- Milliy yoki xalqaro sertifikatlarga ega maktab o'quvchilari soni 56 ming nafardan oshgan;
- Oliy toifali o'qituvchilar ulushi 6–7 yil avval 5–6 foiz bo'lgan bo'lsa, 2026-yil 1-sentabr holatiga 14 foizga yetgan;
- Birinchi toifali pedagoglar ulushi 22 foizga yaqinlashgan;
- 1-sentabr holatiga maktab o'quvchilari nufuzli xalqaro olimpiadalarda qariyb 230 ta medalni qo'lga kiritgan.
O'qituvchilarni tanlashning yangi tizimi
2026-yildan tajriba-sinov tariqasida o'qituvchilarni tanlab olishning yangi tizimi joriy etilgan. Hozircha u har bir hududning bittadan tumanida hamda Buxoro viloyatining barcha 13 ta tumanida amalga oshirilmoqda. Yangi tizimda pedagoglar ochiq platforma orqali test va suhbat asosida tanlab olinadi.
Tajriba-sinov yakunlari bo'yicha vazirlik parlamentga axborot taqdim etadi, shundan so'ng tizimni boshqa hududlarga bosqichma-bosqich joriy etish rejalashtirilgan. Avvalroq ish haqi va stipendiyalarning 1-sentabrdan yangi miqdorda to'lanishi haqida ham yozgan edik.
Izohlar (0)
Izoh yozish uchun tizimga kiring.
Hozircha izohlar yo‘q.
Birinchi bo‘lib izoh qoldiring