Prezidentning “Innovatsion faoliyatda startap loyihalarini tanlash, saralash va moliyalashtirish tizimlarini tubdan takomillashtirish chora-tadbirlari to'g'risida”gi qaror loyihasi Normativ-huquqiy hujjatlar loyihalari muhokamasi portaliga joylashtirildi. Loyihada startaplarni xalqaro texnologik tayyorgarlik darajasi — TRL asosida saralash va moliyalashtirish taklif qilinmoqda.
Hujjat 17-sentabrdan 2-oktabrgacha jamoatchilik muhokamasida bo'ladi.
Maqsadlar
Reklama
- Yillik moliyalashtiriladigan startap loyihalari sonini 50 tadan oshirish;
- Yillik moliyalashtirish hajmini 40 milliard so'mdan oshirish;
- Xususiy sektor, investorlar va venchur jamg'armalari hisobidan yillik 500 ming AQSh dollarigacha investitsiya jalb qilish.
2027-yil 1-yanvardan joriy etilishi taklif qilinayotgan tartib
- Startaplarni qabul qilish, saralash va moliyalashtirish jarayonlari to'liq raqamlashtiriladi — buning uchun Maxsus platforma va ilmiy-innovatsion faoliyat yurituvchi yuridik shaxslar reyestri ishga tushiriladi;
- Faqat inkubatsiya yoki akseleratsiya dasturlarini muvaffaqiyatli yakunlagan startap loyihalari moliyalashtiriladi;
- Takliflarni Oliy ta'lim, fan va innovatsiyalar vazirligi huzuridagi Innovatsion rivojlanish agentligi qabul qiladi va dasturlarga o'tkazish bo'yicha ochiq tanlov e'lon qiladi;
- Dasturlar bilan bog'liq xarajatlar Ilm-fanni moliyalashtirish va innovatsiyalarni qo'llab-quvvatlash jamg'armasi hisobidan qoplanadi;
- Reyestrga kiritishda xorijiy mentorlar mavjudligi, ixtisoslik bo'yicha kamida 5 ta startap loyihasi o'tkazilgani hamda moddiy-texnika bazasi hisobga olinadi;
- Dasturlarni yakunlagan startaplarga maxsus sertifikat beriladi va ekspertlar guruhi ularni moliyalashtirishga tavsiya etadi;
- Oldingi bosqichda muvaffaqiyatli deb topilgan va moliyalashtirilgan loyihalar keyingi bosqich tanlovlarida soddalashtirilgan tartibda qatnashadi;
- Maxsus platformada kraudfanding mexanizmlari joriy etiladi.
TRL bosqichlari bo'yicha moliyalashtirish miqdorlari
Har bir startap loyihani tayyorlash va qo'llab-quvvatlash uchun dastur tashkilotlariga Jamg'arma hisobidan quyidagi miqdorda mablag' ajratilishi taklif qilinmoqda:
| TRL bosqichi | Mablag' (BHMda) | So'mda (BHM 440 ming) |
|---|---|---|
| 1–3 bosqich | 30 baravargacha | 13,2 mln so'mgacha |
| 4–6 bosqich | 50 baravargacha | 22 mln so'mgacha |
| 7–9 bosqich | 70 baravargacha | 30,8 mln so'mgacha |
Dasturlarni muvaffaqiyatli yakunlagan loyihalar esa quyidagicha moliyalashtirilishi nazarda tutilgan:
| TRL bosqichi | Mablag' (BHMda) | So'mda |
|---|---|---|
| 4–6 bosqich (prototip yaratish va sinash) | 485 baravargacha | 213,4 mln so'mgacha |
| 7–9 bosqich (joriy etishga tayyorlash va ishga tushirish) | 4 500 baravargacha | 1,98 mlrd so'mgacha |
Bunda startap loyihasi tashabbuskori tomonidan xususiy mablag'lar jalb qilingan taqdirda byudjet mablag'lari ajratilishiga ruxsat beriladi.
Ilm-fan va sanoat integratsiyasi
Loyihada real iqtisodiyot muammolariga innovatsion yechimlar joriy etish uchun yuridik shaxs maqomiga ega bo'lmagan Innovatsiya va sanoat integratsiyasi kengashini tashkil etish ham taklif qilinmoqda. Kengash tarkibi Prezident Administratsiyasi rahbari tomonidan tasdiqlanadi, ishchi organi — Agentlik. Shuningdek, Agentlik 2027-yil 1-yanvarga qadar startaplarni saralash bo'yicha ochiq tanlov e'lon qilishi va TRL bo'yicha baholash mezonlarini ishlab chiqishi, 2026-yil 1-dekabrga qadar kraudfanding platformasini ishga tushirishi, 2028-yildan dasturlar faoliyatini reyting baholash tartibini joriy etishi ko'zda tutilgan.
Startaplarni qo'llab-quvvatlash bo'yicha startap loyihalariga 5 mlrd so'mgacha garovsiz mablag' berilishi, shuningdek eng innovatsion g'oya tanlovi haqidagi maqolalarimizda ham yozgan edik.
Izohlar (0)
Izoh yozish uchun tizimga kiring.
Hozircha izohlar yo‘q.
Birinchi bo‘lib izoh qoldiring