Filippin maktabida ikki o’quvchi otib o’ldirildi, hujumchi o’z joniga qasd qildi

18-sentabr kuni Filippinning janubidagi Janubiy Kotabato provinsiyasi Banga shahridagi maktabda 16 yoshli o'quvchi sinfdoshlariga qarata o'q uzdi. Ikki nafar o'quvchi halok bo'ldi, sakkiz nafari jarohatlandi, ulardan to'rttasining ahvoli og'ir. Hujumchi voqeadan so'ng o'z joniga qasd qilgan.

Bu haqda Reuters agentligi va CNN xabar berdi.

Voqea tafsilotlari

Banga shahri meri Albert Palensiyaning ma'lumotiga ko'ra, hujumchi 9-sinf o'quvchisi o'z sinfidan chiqib, qo'shni sinfdagi o'quvchilarga tartibsiz o'q uzgan. U 10 nafar o'quvchiga tegib, so'ngra qurolni o'ziga qaratgan. Jabrlanganlarning barchasi 14–17 yoshdagi o'quvchilar.

Hujumchi otasiga — Ta'lim departamenti xodimiga tegishli 9 mm kalibrli to'pponchadan foydalangan. U qurol saqlanadigan seyfni buzib, to'pponchani maktabga olib kelgan va ikkita o'qdon olib yurgan: birinchisini bo'shatgach, qayta o'qlagan.

Hujumdan oldin aytilgan gaplar

Gumondor do'stlari yonida o'tirib, ularga uyga ketishni aytgan: “tushlikdan keyin rejamni amalga oshiraman”. Do'stlari esa kulishgan, chunki u hazilkash sifatida tanilgan edi.

Banga shahri meri Albert Palensiya

Merning qo'shimcha ma'lumotiga ko'ra, hujumchi aqlli o'quvchi va taekvondo bilan faol shug'ullangan, unga nisbatan bezorilik qilingani haqida ma'lumot yo'q.

Onlayn jamoalar tekshirilmoqda

Tergov organlari o'smirning onlayn “true crime” jamoasida post qoldirganini aniqlagan va bu jamoaning xususiyatini o'rganmoqda. Iyun oyida Takloban shahridagi otishma yuzasidan Senat tekshiruvi ham shunday onlayn tarmoq — “True Crime Community” rolini ko'rib chiqqan edi.

Gubernatorning ota-onalarga chaqirig'i

Qurollarni saqlashda mas'uliyatli bo'lishimiz kerak. Ayniqsa, qurol egalari voyaga yetmaganlarning ulardan foydalanish imkoniga ega emasligiga ishonch hosil qilishi lozim.

Janubiy Kotabato gubernatori Reynaldo Tamayo

Gubernator, shuningdek, minglab o'quvchini bir nechta xavfsizlik xodimi bilan nazorat qilishning o'zi yetarli emasligini ta'kidlab, muammoni birgalikda hal qilishga chaqirdi.

Filippinda uchinchi holat

Mazkur hodisa iyun oyidan buyon Filippinda sodir bo'lgan uchinchi halokatli maktab otishmasi hisoblanadi. Avgust oyida mamlakat janubida bir o'quvchi otib o'ldirilgani, iyun oyida esa Takloban shahridagi maktabda kamida uch nafar o'quvchi halok bo'lib, qariyb 20 kishi jarohatlangani haqida avvalroq yozgan edik.