Talabalar shaharchasida joriy etilgan yaxlit boshqaruv va nazorat tizimi mamlakatdagi barcha oliy ta'lim muassasalariga yoyiladi. Bu vazifa Prezident Shavkat Mirziyoyev raisligida 11-sentabr kuni o'tkazilgan videoselektorda belgilandi.
Bu haqda Prezident matbuot kotibi xabar berdi.
Alohida direksiya tuziladi
Reklama
Olmazor tumanida bir vaqtning o'zida 75 ming nafar talaba tahsil oladi. Shu bois ularning o'qishi va yashash sharoiti, bandligi, tadbirkorligi, madaniy hayoti va xavfsizligini qamrab oladigan yaxlit boshqaruv tizimini yo'lga qo'yish zarurligi ta'kidlandi.
Tumandagi 7 ta oliygohga qarashli 41 ta talabalar yotoqxonasida qariyb 18 ming nafar yosh istiqomat qiladi. Ularning yashash sharoitini yaxshilash, yotoqxonalar atrofini obod saqlash, yashil hududlar va buk-kafelarni ko'paytirish, madaniy tadbirlarni muntazam tashkil etish uchun alohida Direksiya tuziladi.
“Yoshlik” shaharchasi hokimligi tizimida esa talabalarning ta'lim-tarbiyasi, bandligi, ijtimoiy ta'minoti va xotin-qizlar masalalari bilan ishlaydigan alohida mas'ullar faoliyati tashkil etiladi.
Davomat va kirib-chiqish onlayn nazorati
Talabalar shaharchasida tashkil etilgan Vaziyatlar markazi orqali oliygoh va yotoqxonalarga kirib-chiqish hamda davomatni onlayn nazorat qilish amaliyoti yaxshi natija berayotgani qayd etildi.
Tizimni joriy yil yakunigacha Toshkent shahrining boshqa tumanlariga, kelgusi yili esa mamlakatdagi barcha oliy ta'lim muassasalariga joriy etish vazifasi qo'yildi.
Shaharchadagi raqamli tizimning tafsilotlari haqida Talabalar shaharchasidagi raqamli xavfsizlik tizimi haqidagi maqolamizda yozgan edik.
Izohlar (0)
Izoh yozish uchun tizimga kiring.
Hozircha izohlar yo‘q.
Birinchi bo‘lib izoh qoldiring