Ijtimoiy tarmoqlarda Toshkent shahrining Yashnobod tumanidagi 151-maktabda 3-sinf o'quvchisi yuqori sinf o'quvchilari tomonidan og'ziga solib yuborilgan noma'lum metall buyumni yutib yuborgani haqida xabar tarqaldi. Holat yuzasidan Toshkent shahar maktabgacha va maktab ta'limi boshqarmasi hamda Bolalar ombudsmani rasmiy munosabat bildirdi.
Ma'lum qilinishicha, voqea joriy yilning 2-sentabr kuni o'quvchi hojatxonaga chiqqan vaqtda sodir bo'lgan. 5-sentabrda bolaning sog'lig'i keskin yomonlashib, kuchli og'riqlar bilan shifoxonaga olib borilgan. Rentgen tekshiruvida uning ichki a'zolarida metall buyum borligi aniqlangan.
Shundan so'ng o'quvchi 3 soat davom etgan shoshilinch jarrohlik amaliyotini boshdan kechirgan, jarrohlar ichakning shikastlangan qismini olib tashlashga majbur bo'lgan. Hozirda bolaga barcha tibbiy yordam ko'rsatilgan.
Reklama
Rasmiy munosabat va tekshiruv
Toshkent shahar maktabgacha va maktab ta'limi boshqarmasi munosabatida o'quvchiga barcha tibbiy yordamlar ko'rsatilgani va ahvoli qoniqarli ekani qayd etilgan. “Ayni vaqtda sodir bo’lgan voqea yuzasidan tegishli huquqni muhofaza qiluvchi tashkilotlar tomonidan tergovga qadar tekshiruv ishlari olib borilmoqda va uning yakuni bo’yicha qo’shimcha ma’lumot beriladi”, deyiladi xabarda.
Bolalar ombudsmani ham vaziyatni nazoratga olgan. Uning ma'lumotiga ko'ra, holat yuzasidan tuman IIB tergovga qadar tekshiruv harakatlarini olib bormoqda, ombudsman kotibiyati xodimlari esa joyiga chiqqan holda vaziyatni o'rganmoqda. Ombudsman bolaning buzilgan huquqlari tiklanishi va ta'lim muassasalarida bolalar xavfsizligi ta'minlanishi yuzasidan kuzatuvni davom ettiradi.
Ta'lim muassasalarida xavfsizlikni ta'minlash bo'yicha choralar avvalroq ham belgilangan: Vazirlar Mahkamasining qarori bilan maktablarda biometrik kirish tizimlari, videokuzatuv kameralari va “tashvish” tugmalari bosqichma-bosqich joriy etilmoqda — bu haqda batafsil.
Izohlar (0)
Izoh yozish uchun tizimga kiring.