O'zbekiston Respublikasining 2026-yil 11-sentabrdagi 1174-son Qonuni bilan ayrim qonunchilik hujjatlariga zarur o'zgartirish va qo'shimchalar kiritildi. Unga ko'ra, tarbiyalanuvchilarga nisbatan zo'ravonlik sodir etgan tarbiyachilar uchun javobgarlik belgilandi. Bu haqda huquqiy axborot kanalida ma'lum qilindi.
Ma'muriy javobgarlik
Ma'muriy javobgarlik to'g'risidagi kodeksga kiritilgan qo'shimchalarga ko'ra, ta'lim tashkilotida voyaga yetmagan bolalarni tarbiyalash va ularga ta'lim berish majburiyati yuklangan shaxs tarbiya jarayonida bolaga jismoniy zo'ravonlik qilsa, shuningdek uni kamsitsa yoki xo'rlasa, BHMning 1 baravaridan 5 baravarigacha miqdorda jarima solinadi. Bu jinoyat alomatlari hamda boshqa huquqbuzarlik alomatlari mavjud bo'lmagan holatlarga taalluqli.
Reklama
Pedagogik faoliyatga bir yillik taqiq
Pedagogik faoliyat jarayonida voyaga yetmaganlarga nisbatan jismoniy yoki ruhiy zo'ravonlikka oid huquqbuzarlik sodir etganlik uchun ma'muriy javobgarlikka tortilgan shaxslar 1 yil muddat davomida quyidagi ta'lim tashkilotlarida pedagogik faoliyat bilan shug'ullanishiga yo'l qo'yilmaydi:
- Maktabgacha ta'lim tashkilotlari;
- Umumiy o'rta va o'rta maxsus ta'lim tashkilotlari;
- Professional ta'lim tashkilotlari;
- Bolalar uchun qo'shimcha ta'lim tashkilotlari.
Alimentga oid o'zgarishlar
Qonun bilan davlat yoki nodavlat muassasalarining to'liq ta'minotida bo'lgan voyaga yetmagan bolaga aliment to'lashi shart bo'lgan ota yoki onani aliment to'lashdan ozod qilishga yo'l qo'yilmaydi. Shuningdek, ota-ona qaramog'idan mahrum bo'lgan bola foydasiga ota-onadan yoki ularning biridan undirilishi belgilangan aliment miqdorini kamaytirish bo'yicha ishlarga “Inson” ijtimoiy xizmatlar markazlari jalb etiladi.
O'qituvchilarga o'quvchiga jismoniy kuch ishlatish taqiqlangani haqida alohida maqolada yozilgan edi.
Izohlar (0)
Izoh yozish uchun tizimga kiring.