Nodavlat ta’lim markazlariga murojaatlarning 96 foizi muammo bilan bog’liq

Farzandingizni xususiy o'quv markaziga berdingiz, oylik to'lovni ham vaqtida to'ladingiz, ammo bir necha oydan keyin na natija bor, na pulni qaytarishning izi. Bunday holat yakka misol emasligi rasmiy tahlilda tasdiqlandi. Raqobatni rivojlantirish va iste'molchilar huquqlarini himoya qilish qo'mitasi nodavlat ta'lim xizmatlari bozorini o'rganib, e'tiborli xulosalarga keldi.

Tahlil natijalari

So'nggi 3 yilda ta'lim xizmatlariga oid 2 070 ta murojaat kelib tushgan. Ularning qariyb 96 foizi nodavlat ta'lim tashkilotlari faoliyati bilan bog'liq bo'lib chiqqan. Tekshiruvlar yakunida iste'molchilar foydasiga 1 milliard so'mga yaqin mablag'ning qayta hisob-kitob qilinishi ta'minlangan.

Shikoyatlar tarkibi

Fuqarolar murojaatlarida takrorlanadigan muammolar besh guruhga ajratilgan. Ular asosan xizmat sifati va pul masalasiga taqaladi.

• Ta'lim sifati pastligi;
• Ko'rsatilmagan xizmat uchun haq olinishi;
• Shartnoma va pulni qaytarish shartlari ochiq tushuntirilmasligi;
• Muddatli to'lov shartnomasini bekor qilishdagi muammolar;
• Reklamadagi va'dalar amalda bajarilmasligi.

Qo'mita takliflari

Vaziyatni o'zgartirish uchun qo'mita vakolatli davlat organlariga uchta taklif yubordi. Ular bozorni tartibga solish va iste'molchini himoya qilishga qaratilgan.

• Nodavlat ta'lim xizmatlari uchun ixtiyoriy sertifikatlash tizimini joriy etish;
• Pullik ta'lim xizmatlarini ko'rsatishning yagona qoidalarini ishlab chiqish;
• Iste'molchilar bilan munosabatlarga qo'yiladigan talablarni belgilash.

Qayd etilishicha, bu choralar ta'lim sifati oshishiga, iste'molchilar huquqlari kuchayishiga hamda bozorda shaffof va adolatli raqobat muhiti yaratilishiga xizmat qiladi. Eslatib o'tamiz, nodavlat ta'limda sifat endi sertifikatlanadi va bu jarayonning tafsilotlari avval yoritilgan edi. InfoEdu.uz tahlilchilari xususiy ta'lim bozoridagi har bir muhim o'zgarishni kuzatib bormoqda.