Tibbiyot va farmatsevtika xodimlariga malaka oshirish uchun ta’lim provayderi, dastur va ta’lim shaklini mustaqil tanlash huquqi beriladi. Yangi tartib doirasida ishdan ajralmagan holda masofaviy va kechki shakllarda o‘qish imkoniyati ham yaratiladi.
Sog‘liqni saqlash vazirligi matbuot xizmati ma’lum qilishicha, tibbiyot va farmatsevtika xodimlarining uzluksiz ta’lim olish jarayonida ta’lim provayderi, dastur hamda o‘qish shaklini erkin tanlash huquqi rasman mustahkamlanmoqda.
Jumladan, xodimlar masofaviy va kechki ta’lim shakllari orqali ish faoliyatidan ajralmagan holda kasbiy bilim va ko‘nikmalarini oshirishi mumkin bo‘ladi.
Reklama
Malaka oshirish uchun mablag‘ qanday ajratiladi?
Yangi tizimda tibbiyot xodimlarining kasbiy malakasini oshirish uchun Davlat budjeti hisobidan ajratilayotgan mablag‘larning amaldagi hajmi to‘liq saqlab qolinadi.
Moliyaviy resurslarni taqsimlashda vaucher tizimidan foydalaniladi. Bunda mablag‘ markazlashgan holda muayyan muassasaga emas, bevosita shifokorga biriktiriladi.
Natijada tibbiyot xodimi o‘z ehtiyojidan kelib chiqib, malaka oshirish uchun o‘zi ma’qul deb topgan ta’lim provayderini tanlash imkoniga ega bo‘ladi.
Ta’lim provayderlari soni oshiriladi
Bugungi kunda tibbiyot xodimlariga uzluksiz ta’lim xizmatlarini ko‘rsatish sohasida raqobat asosida 10 ta oliy ta’lim muassasasi, 29 ta tibbiyot markazi va 30 dan ortiq xususiy provayder faoliyat yuritmoqda.
Yaqin yillarda ta’lim provayderlari sonini 100 tadan oshirish rejalashtirilmoqda. Bu esa tibbiyot xodimlari uchun malaka oshirish dasturlari va ta’lim shakllarini tanlash imkoniyatlarini kengaytirishi ko‘zda tutilgan.
Xorijiy tajriba ham joriy etiladi
Yangi tizimni rivojlantirish jarayoniga xalqaro miqyosda tan olingan hamkorlar ham jalb qilinmoqda. Jumladan, AQShning uzluksiz tibbiy ta’lim bo‘yicha akkreditatsiya kengashi bilan hamkorlik qilish rejalashtirilgan.
Shuningdek, tibbiyot mutaxassislarining Rossiya va boshqa xorijiy davlatlarda tajriba orttirishi ham yo‘lga qo‘yiladi.
InfoEdu.uz o‘rganishicha, mazkur o‘zgarishlar tibbiyot va farmatsevtika xodimlari uchun uzluksiz kasbiy ta’limni yanada moslashuvchan tashkil etishga qaratilgan.
2030-yilgacha 600 mingdan ortiq xodim qamrab olinadi
Rejaga ko‘ra, 2030-yilga borib uzluksiz tibbiy ta’lim bilan qamrovni 100 foizga yetkazish maqsad qilingan.
Bu jarayonda 600 ming nafardan ortiq tibbiyot va farmatsevtika xodimini uzluksiz tibbiy ta’lim tizimiga qamrab olish ko‘zda tutilmoqda.
Izohlar (0)
Izoh yozish uchun tizimga kiring.