Davlat tibbiyot tizimida uzoq yillar faoliyat yuritgan mutaxassislarni qo‘llab-quvvatlash maqsadida yangi imtiyoz joriy etilmoqda. Prezident qaroriga ko‘ra, kamida 15 yil mehnat stajiga ega bo‘lgan tibbiyot va farmatsevtika xodimlarining farzandlari uchun oliy ta’lim kontraktining bir qismi davlat tomonidan qoplab beriladi.
Kontraktning 30 foizi qoplanadi
Yangi tartibga asosan, davlat tibbiyot muassasalarida kamida 15 yil uzluksiz mehnat qilgan xodimlarning farzandlari bakalavriat bosqichida tahsil olayotgan bo‘lsa, ularning kontrakt to‘lovining 30 foizi qoplab beriladi.
Reklama
Mazkur imtiyoz davlat va nodavlat oliy ta’lim muassasalarida bakalavriat yo‘nalishida o‘qiyotgan yoki o‘qishga qabul qilingan talabalarga tatbiq etiladi.
To‘lov miqdori qancha bo‘ladi?
Kontraktning qoplanadigan qismi bazaviy hisoblash miqdorining 15 baravaridan oshmasligi belgilangan.
2025-yil amaldagi BHM miqdoridan kelib chiqib, ushbu summa 6 million 180 ming so‘mgachani tashkil etadi.
| Ko‘rsatkich | Miqdori |
|---|---|
| Qoplanadigan ulush | 30 foiz |
| Maksimal miqdor | 6 mln 180 ming so‘m |
| Ta’lim bosqichi | Bakalavriat |
| OTM turi | Davlat va nodavlat |
| Amal qilish sanasi | 2026-yil 1-yanvar |
Imtiyoz kimlarga beriladi?
Quyidagi toifadagi fuqarolar ushbu qo‘llab-quvvatlash tizimidan foydalanishi mumkin:
- Respublika hududidagi davlat tibbiyot muassasalarida faoliyat yuritayotgan shifokorlar;
- Hamshiralar va feldsherlar;
- Farmatsevtika sohasi mutaxassislari;
- Kamida 15 yil uzluksiz mehnat stajiga ega xodimlar;
- Ularning davlat yoki nodavlat OTMlarning bakalavriat bosqichida tahsil olayotgan farzandlari.
Mablag‘lar qayerdan ajratiladi?
Kontrakt to‘lovlarini qoplash uchun mablag‘lar Tibbiyot muassasalarining moddiy rag‘batlantirish va rivojlantirish jamg‘armasi hisobidan yo‘naltiriladi.
Mazkur jamg‘arma quyidagi manbalar asosida shakllantiriladi:
- tibbiyot muassasalarining o‘z faoliyatidan tushgan daromadlari;
- ko‘rsatilgan xizmatlar uchun tushumlar;
- grant mablag‘lari;
- qonunchilikda taqiqlanmagan boshqa manbalar.
Minglab oilalarga yengillik yaratadi
Yangi tizim 2026-yil 1-yanvardan kuchga kiradi va minglab tibbiyot xodimlari oilalarining ta’lim xarajatlarini kamaytirishga xizmat qiladi.
Bu tashabbus sog‘liqni saqlash tizimida yillar davomida fidokorona mehnat qilgan mutaxassislarga davlat tomonidan bildirilayotgan e’tirof va rag‘bat sifatida baholanmoqda.
Izohlar (0)
Izoh yozish uchun tizimga kiring.