Jahon toji bahsida 2,5 million dollar o’ynaladi, har bir g’alaba 200 ming dollar

FIDE amaldagi jahon chempioni Gukesh D va hamyurtimiz Javohir Sindarov o'rtasidagi jahon chempionligi uchrashuvining rasmiy reglamentini tasdiqladi. Bahsning jami mukofot jamg'armasi 2,5 million AQSh dollarini tashkil etadi — bu haqda FIDE saytida ma'lum qilindi.

Mukofot jamg'armasining tarkibi

Jamg'arma mahalliy soliqlar chegirilmasidan oldingi miqdorni bildiradi. Odatiy tartibda har bir shaxmatchiga yutgan har bir partiyasi uchun 200 ming dollardan ajratiladi, jamg'armada qolgan pul esa ikkala ishtirokchiga teng bo'lib beriladi. Ya'ni mukofotning katta qismi g'alabalar soniga bog'liq emas — u teng taqsimlanadi.

Pul taqsimoti misolda

Bir shaxmatchi 3 ta, raqibi 2 ta partiyada g'alaba qozonib, qolgan 9 ta partiya durang bilan yakunlangan holatni ko'raylik. G'alabalar uchun birinchisiga 600 ming, ikkinchisiga 400 ming dollar ajratiladi, qolgan 1,5 million dollar teng bo'linadi.

Istisno holatlar

• G'olib tay-brekda aniqlansa;
• 13 ta partiya g'alaba bilan, bittasi durang bilan tugab, yakuniy hisob 7,5:6,5 bo'lsa;
• barcha 14 ta partiya g'alaba bilan tugab, yakuniy hisob 8:6 bo'lsa.

Bunday holatlarda chempionga 1,3 million, raqibiga 1,2 million dollar beriladi. Demak, odatiy tartibda mukofot miqdori shaxmatchining qancha partiyada g'alaba qozonganiga bog'liq bo'ladi.

Bahs sanalari va formati

Bahs Shveytsariyaning Jeneva shahri yaqinidagi Kolognida joylashgan Fondation Martin Bodmer majmuasida 22-noyabrdan 12-dekabrgacha bo'lib o'tadi. Rasmiy dastur 22-noyabr kuni ochilish marosimi bilan boshlanadi, birinchi klassik partiya 24-noyabrda o'ynaladi, tay-breklar zarurat tug'ilsa 12-dekabr kuni o'tkaziladi.

Bahs maksimal 14 ta klassik partiyadan iborat: 7,5 ochko to'plagan shaxmatchi chempion bo'ladi. Gukesh 2024-yil dekabrda jahon chempioni bo'lgan, Sindarov esa 2026-yil Kiprdagi nomzodlar turnirida 10 ochko bilan bir tur oldin g'olib chiqib, so'zsiz jahon chempioni unvoni uchun bahsga chiqqan birinchi o'zbekistonlik shaxmatchiga aylandi. Uning nomzodlar turniridagi g'alabasi haqida avvalroq yozilgan edi.

Bahs boshlanganda ikkala shaxmatchi ham 20 yoshda bo'ladi — bu tarixdagi eng yosh jahon chempionligi bahsi hisoblanadi. Bahsning bosh homiyi Salesforce bo'lib, kelishuv 2026 va 2028-yilgi jahon chempionligi bahslarini hamda 2027-yilgi ayollar o'rtasidagi bahsni qamrab oladi.