1-oktabr mukofotini faqat o’qituvchilar emas, barcha xodimlar oladi

1-oktabr — O'qituvchi va murabbiylar kuni munosabati bilan mukofot faqat pedagoglarga beriladi deb o'ylash odatiy hol. Aslida mehnat qonunchiligi tashkilotning barcha toifa xodimlarini mukofotlashga ham yo'l qo'yadi — bu ish beruvchining mehnat haqidagi huquqiy hujjatlariga bog'liq.

Asos bo'ladigan hujjatlar

Mehnat kodeksining 12-moddasiga ko'ra mehnat haqidagi boshqa huquqiy hujjatlarga quyidagilar kiradi:

• jamoa kelishuvlari;
• jamoa shartnomalari;
• ish beruvchi tomonidan kasaba uyushmasi qo'mitasi bilan kelishuvga ko'ra qabul qilinadigan ichki hujjatlar;
• ish beruvchi o'z vakolatlari doirasida yakka o'zi qabul qiladigan yakka tartibdagi huquqiy hujjatlar — buyruq, farmoyish, qarorlar (MK 18-moddasi).

Mehnat kodeksining 13-moddasiga ko'ra bunday hujjatlarda xodimlar uchun qonunchilikda belgilanganidan ko'ra qo'shimcha huquq va kafolatlar nazarda tutilishi mumkin.

Barcha xodimlar mukofot oladigan holat

Agar tashkilotning jamoa shartnomasida ish beruvchi tomonidan tasdiqlangan smetalarga muvofiq Mehnat kodeksining 208-moddasida nazarda tutilgan bayramlar munosabati bilan mukofotlash qo'llanilishi yozilgan bo'lsa, 9 ta ishlanmaydigan bayram kuni munosabati bilan barcha xodimlar — jinsidan, lavozimidan qat'i nazar, boshqaruv va texnik xodimlar ham mukofotlanadi. Ya'ni 1-oktabr va 8-mart uchun barcha xodimlarga mukofot beriladi.

Majburiyat bajarilmasa

Mehnat kodeksining 34-moddasiga ko'ra ijtimoiy sheriklikda majburiyatlar ixtiyoriy ravishda olinadi, biroq olingan majburiyatlar haqiqatda bajarilishi shart. Jamoa shartnomasi majburiyatlarini bajarmaslik mehnat qonunchiligini buzish sifatida baholanadi va Ma'muriy javobgarlik to'g'risidagi kodeksning 49-moddasi bo'yicha javobgarlikka sabab bo'ladi.

Agar jamoa shartnomasi yoki ichki hujjatlarda mukofot nazarda tutilmagan bo'lsa ham, ish beruvchi o'z vakolati doirasida yakka tartibdagi hujjat — buyruq yoki farmoyish bilan mukofot belgilash huquqiga ega.

O'qituvchi va murabbiylar kuni munosabati bilan beriladigan mukofot miqdori haqida alohida materialimizda yozgan edik.