Toshkent shahri Olmazor tumanidagi mahallalardan birida 13 yoshli maktab o‘quvchisi suvga tushib ketgan koptokni olishga uringan vaqtida kanalga tushib ketdi. Kuchli oqimda oqib ketayotgan bolani kanal bo‘yidagi restoran xodimlari ko‘rib qolgan va qutqarib olishgan.
Qutqarish jarayoni
Xodimlardan biri bolaning ortidan suvga tushgan, keyinchalik uning ustozi ham yordamga qo‘shilgan. Ular avval daraxtlardan ushlashga uringan, biroq shoxlar sinib ketgan. Shundan so‘ng suvda oqib kelayotgan singan daraxtga tayanib, bolani qirg‘oqqa olib chiqishga muvaffaq bo‘lishgan.
Bolaning ahvoli
Voqeadan so‘ng bola shifoxonaga olib borilgan. Favqulodda vaziyatlar boshqarmasi vakilining ma’lum qilishicha, uning ahvoli yaxshi va tibbiy nazorat ostida. Mutaxassisning ta’kidlashicha, bola o‘z vaqtida suvdan chiqarilmaganida kuchli oqim uni GES tomon olib ketishi mumkin edi. Bolani qutqarishda ishtirok etgan restoran ofitsiantini taqdirlash rejalashtirilmoqda.
Hammasi tugadi, deb o‘yladim. Keyin yorug‘lik ko‘rindi va darhol boshimni suvdan chiqardim. Koptok yoki boshqa narsa suvga tushsa, oqib ketaversin. Odamning hayotidan qimmat narsa yo‘q. Meni qutqarganlari uchun rahmat.
Bola (13 yosh)
