1-oktabr mukofotini dekretdan qaytgan va yangi ishga kirganlar ham oladi

Ayrim ta'lim muassasalarida yangi ishga kirgan, dekret ta'tilidan qaytgan yoki mehnat ta'tilida bo'lgan pedagoglarga 1-oktabr — O'qituvchi va murabbiylar kuni munosabati bilan beriladigan mukofot puli to'lanmayotgani haqida murojaatlar kelib tushmoqda.

Umumta'lim muassasalari xodimlari, shu jumladan rahbar xodimlari bayram munosabati bilan mehnatga haq to'lashning eng kam miqdorining 75 foizigacha miqdorida mukofotlanishi mumkin.

Mehnat kodeksida qanday belgilangan

• Mehnat kodeksining 252-moddasiga ko'ra mehnatga haq to'lash tizimida nazarda tutilmagan rag'batlantiruvchi mukofot bir marta beriladigan xususiyatga ega va u xodimning oldindan belgilangan ko'rsatkichlarga erishgani uchun emas, balki muayyan voqealar — yubileylar, bayram sanalari va boshqalar munosabati bilan to'lanadi;
• 246-moddaga ko'ra rag'batlantiruvchi xususiyatga ega qo'shimcha to'lovlar va mukofotlash tizimlari jamoa kelishuvida, jamoa shartnomasida, kasaba uyushmasi qo'mitasi bilan kelishuvga ko'ra qabul qilinadigan ichki hujjatlarda yoki mehnat shartnomasida belgilanadi.

To'lovni istisno qiluvchi qoidalar

Agar jamoa kelishuvlari, jamoa shartnomasi yoki ichki hujjatlarda bunday qoidalar nazarda tutilmagan bo'lsa, dekret ta'tilidan qaytgan, yangi ishga kirgan yoki mehnat ta'tilida bo'lgan xodimlarga ham mukofot puli berilishi mumkin. “Umumiy o'rta ta'lim muassasalarining o'rnak ko'rsatgan xodimlarini rag'batlantirishning direktor jamg'armasini tashkil etish va uning mablag'laridan foydalanish tartibi to'g'risida”gi nizomda ham bu toifadagi pedagoglarga mukofot berilmasligi haqida qoida yo'q.

Qo'shimcha huquqiy asoslar

• Pedagogning maqomi to'g'risidagi qonunning 13-moddasida davlat ta'lim tashkilotlari pedagoglariga budjet va budjetdan tashqari mablag'lar hisobidan moddiy rag'batlantirishning boshqa turlari belgilanishi mumkinligi nazarda tutilgan;
• Mehnat kodeksining 501-moddasiga ko'ra ta'lim tashkilotlari mavjud mablag'lar doirasida lavozim maoshlariga tabaqalashtirilgan ustamalar belgilashga hamda rag'batlantirishning turli shakllarini qo'llashga haqli.

Shu sababli yangi ishga kirgan, dekret ta'tilidan qaytgan yoki mehnat ta'tilida bo'lgan pedagoglarga ham mukofot puli berilishi mumkin.

Intizomiy jazo bo'lsa

Diqqat: agar xodim intizomiy jazo olgan bo'lsa, jazoning amal qilish muddati ichida unga nisbatan rag'batlantirish choralari — shu jumladan mehnatga haq to'lash tizimiga kirmaydigan va mehnat natijalariga asoslanmagan mukofotlar (bayramlar, kasb bayramlari, yubileylar munosabati bilan beriladigan mukofotlar ham) qo'llanilmaydi.

Bayram mukofotining eng ko'p miqdori va uni hisoblash tartibi haqida alohida materialimizda yozgan edik.