Braziliyaning Espirito-Santu shtatidagi San-Gabriel-da-Palya shahrida 36 yoshli fermer o'zining 8 yoshli o'g'lini o'ldirishni rejalashtirgani uchun qo'lga olingan. Tergov ma'lumotlariga ko'ra, u jinoyat rejasini ishlab chiqishda ChatGPT'dan foydalangan, bu haqda platforma kompaniyasi AQSh Federal qidiruv byurosiga (FBI) xabar bergan — CNN Brasil nashri xabar berdi.
Holat tafsilotlari
Aniqlanishicha, erkak sobiq turmush o'rtog'iga aliment to'lashdan qochish maqsadida o'g'lini o'ldirishni rejalashtirgan. U sun'iy intellekt vositasi bilan bir necha bor suhbat olib borib, qurol, zahar va yollanma qotil jalb qilish kabi usullarni o'rgangan. Tergovchilarning ma'lum qilishicha, u maktablar va cherkovlarda ommaviy hujumlar uyushtirish niyatini ham bildirgan.
Reklama
Suhbatlarning birida gumondor hujumlarda imkon qadar ko'proq odamga zarar yetkazish uchun allaqachon qurol, arqon va siyanidga ega ekanini aytgan.
Ma'lumotning yetib kelish yo'li
- Platforma kompaniyasi gumondorning o'g'lini o'ldirish niyatiga oid doimiy qidiruvlarini FBIga yuborgan;
- FBI bu ma'lumotlarni Braziliya Adliya va jamoat xavfsizligi vazirligining CyberLab bo'limiga yetkazgan;
- U yerdan holat Espirito-Santu shtati politsiyasiga o'tkazilgan — ma'lumot politsiyaga 16-iyun kuni kelib tushgan.
Politsiya ma'lumotni olganidan uch kun o'tib, rejalashtirilgan hujum sanasidan bir kun oldin — 19-iyun kuni gumondor ish joyidan chiqayotgan vaqtda qo'lga olingan. Tintuv vaqtida uning telefoni va boshqa buyumlari olib qo'yilib, ilmiy-tekshiruv politsiyasiga ekspertizaga yuborilgan.
Platforma kompaniyasi FBIga shaxs o'z farzandini o'ldirish niyati bilan doimiy qidiruv olib borgani haqida ma'lumot yubordi. FBI bu ma'lumotlarni Adliya vazirligining CyberLab bo'limiga, u esa holatni fuqarolik politsiyasiga yetkazdi. Sakkiz yildan beri kibertergovlar bilan shug'ullanamiz va milliy hamda xalqaro idoralar o'rtasidagi bunday hamkorlik ko'plab operatsiyalarning muvaffaqiyatli yakunlanishida muhim omil bo'lib kelmoqda.
Espirito-Santu politsiyasi vakili
Tergov holati
So'roq vaqtida gumondor ChatGPT orqali tegishli qidiruvlarni amalga oshirganini tan olgan, biroq o'g'lini o'ldirish niyati bo'lganini inkor qilgan. Politsiya esa sun'iy intellekt vositasi bilan olib borilgan suhbatlarda jinoyatni rejalashtirishga oid ma'lumotlar borligini bildirgan.
U qidiruvlarni amalga oshirganini tasdiqladi, ammo bu harakatlarni amalda qo'llash niyatini inkor etdi. Endi suhbatlardan olingan ma'lumotlarni musodara qilingan telefonlardan olingan mazmun bilan solishtiramiz. Maqsad — qotilliklarni amalga oshirish yoki uchinchi shaxslarni jalb qilish bo'yicha haqiqiy choralar ko'rilgan-kurilmaganini aniqlash.
Tergovchi
Gumondor dastlab tahdid qilish va jinoyatga undash moddalari bo'yicha jalb etilgan, yakuniy ayblovlar tergov yakuniga ko'ra belgilanadi.
ChatGPT ta'siriga oid ikki yillik tajriba natijalari haqida ham yozgan edik.
Izohlar (0)
Izoh yozish uchun tizimga kiring.
Hozircha izohlar yo‘q.
Birinchi bo‘lib izoh qoldiring