Jadidlar izidan tanlovida 14 g’olib xorijga ta’lim sayohatiga yuboriladi

Maktabgacha va maktab ta'limi vazirligi huzuridagi Respublika “Kelajak” markazi “Jadidlar izidan” respublika ko'rik-tanlovining uchinchi mavsumini boshladi. Tanlovda 6–10-sinf o'quvchilari ishtirok etishi mumkin, arizalar 15-oktabrgacha qabul qilinadi.

Ishtirokchilar va bosqichlar

• Davlat va nodavlat umumiy o'rta ta'lim tashkilotlarining 6–10-sinf o'quvchilari qatnashadi;
• O'quvchilar 6–7–8-sinflar hamda 9–10-sinflar bo'yicha ikki toifaga ajratiladi;
• Tuman (shahar) bosqichi — 2026-yil oktyabr oyida;
• Hududiy bosqich — 2026-yil noyabr oyida;
• Respublika bosqichi — 2026-yil dekabr oyida.

Tuman bosqichi shartlari

Tuman (shahar) bosqichida ishtirokchilar ikki shart bo'yicha bellashadi: birinchi shartda jadidlar hayoti va ijodiga oid 25 ta test savoliga javob beriladi (har bir to'g'ri javob uchun 2 ball, 25 daqiqa vaqt). Test natijalariga ko'ra eng yuqori ball to'plagan ishtirokchilar ikkinchi shartda ishtirok etish huquqini oladi. Ikkinchi shartda ishtirokchi bilet tortish orqali tanlangan savolga 5 daqiqa davomida fikr-mulohazasini bayon etadi — tayyorgarlik uchun vaqt ajratilmaydi.

Hududiy va respublika bosqichlari

Hududiy bosqichda uchta shart bo'yicha bellashuv o'tkaziladi: boshqotirma (10 ta savol, 20 ballgacha), asar tahlili (50 ballgacha) va insho (30 ballgacha). Respublika bosqichida esa jadidlar hayoti, ijodi va asarlari tahlili bo'yicha savollar (30 ballgacha), erkin mavzular asosida loyiha taqdimoti hamda insho (30 ballgacha) bo'yicha baholanadi.

• Loyiha 7–10 sahifadan iborat bo'lishi va 10 daqiqa davomida taqdim etilishi lozim;
• Insho 2 sahifadan kam bo'lmasligi kerak, yozish uchun 45 daqiqa beriladi.

G'oliblar uchun imtiyozlar va ro'yxatdan o'tish

Tanlovning respublika bosqichida har ikki sinf toifasi bo'yicha eng yuqori natija qayd etgan jami 14 nafar ishtirokchi xorijiy davlatlarga ta'lim sayohatiga yuboriladi. Shuningdek, ular oliy ta'lim muassasalarining kasbiy (ijodiy) imtihonida soha bo'yicha eng yuqori ball olish imkoniyatiga ega bo'ladi.

Ro'yxatdan o'tish havolalari: 6–8-sinf va 9–10-sinf o'quvchilari uchun alohida. Tanlov nizomi bilan “Kelajak” markazi kanallari orqali tanishish mumkin.