OTMga tavsiyanoma: O‘tgan yilgi hujjat bu yil amal qiladimi?

Tavsiyanoma muddati va foydalanish tartibi

Ko‘plab abituriyent xotin-qizlarni qiziqtirgan savolga Oila va xotin-qizlar qo‘mitasi boshqarma boshlig‘i O‘g‘iloy O‘rozova aniqlik kiritdi. Vazirlar Mahkamasi qaroriga ko‘ra, 5 yillik mehnat stajiga ega xotin-qizlarga berilgan tavsiyanoma 3 yil muddatga amal qiladi.

Bu muddat davomida hujjatdan faqat bir marta oliy ta’lim muassasasiga kirish uchun foydalanish mumkin. Agar o‘tgan yili tavsiyanoma olgan, lekin oliygohlar kirish ballari asosida o‘qishga kira olmagan bo‘lsangiz, joriy yilda ham ushbu tavsiyanomadan foydalanishingiz mumkin.

Familiya o‘zgarganda yoki pasport yangilanganda nima bo‘ladi?

Ko‘pchilik abituriyentlarda pasport almashinuvi yoki familiya o‘zgarishi tavsiyanomaga ta’sir qiladimi degan xavotir bor. Mutaxassisning ta’kidlashicha, barcha ma’lumotlar JShShIR (j (Jismoniy shaxsning shaxsiy identifikatsion raqami) orqali bazada saqlanadi. Pasport seriyasi o‘zgarsa ham, JShShIR o‘zgarmasligi sababli, siz hech qanday to‘siqlarsiz hujjat topshirishingiz mumkin.

Mehnat stajini hisoblashda yangiliklar

Yangi tahrirdagi Mehnat kodeksiga asosan:

• Bolani parvarishlash ta’tillari davrida xodimning ish joyi saqlanadi.
• Ushbu ta’tillarning ko‘pi bilan olti yili mehnat stajiga qo‘shiladi.
• Mutaxassisligi bo‘yicha staj hisoblanganda, bola parvarishi ta’tilidagi davr ham inobatga olinadi.

Qo‘shimcha ma’lumotlar va abituriyentlar uchun foydali maslahatlarni bizning saytimizda kuzatib boring.