Masofaviy ta’limga qabul bir yo’nalishga 300 talabadan oshmasligi kerak

Masofaviy ta'lim shakli davlat ta'lim standartlari asosida tashkil etilsa, kunduzgi ta'lim shaklidan sifat jihatidan katta farq qilmasligi mumkin. Bu ko'p jihatdan talabaning mustaqil o'zlashtirish qobiliyatiga ham bog'liq.

Biroq bu ta'lim shakli uchun qabul va o'quv jarayoniga qat'iy cheklovlar belgilangan. Vazirlar Mahkamasining 2022-yil 3-oktabrdagi 559-son qarori bilan tasdiqlangan Nizomga ko'ra, masofaviy ta'lim shaklini faqat shu tartibda tashkil etish mumkin.

Qabulga qo'yiladigan cheklovlar

• Bir bakalavriat ta'lim yo'nalishiga qabul parametrlari 300 nafar talabadan oshmasligi lozim;
• Bir magistratura mutaxassisligiga qabul parametrlari 30 nafar talabadan oshmasligi lozim;
• Talabalar sonini aniqlashda xorijiy davlat fuqarosi bo'lgan talabalar hisobga olinmaydi, axborot-kommunikatsiya texnologiyalari yo'nalishlariga bu talab tatbiq etilmaydi;
• Masofaviy ta'limda bir o'qituvchiga to'g'ri keladigan talabalar soni nisbati 1:50 etib belgilangan.

Masofaviy ta'lim joriy etiladigan shartlar

Masofaviy shaklda ta'lim faqat kunduzgi shaklda tegishli bakalavriat ta'lim yo'nalishi yoki magistratura mutaxassisligi mavjud bo'lgan oliy ta'lim tashkilotlarida yo'lga qo'yiladi (axborot-kommunikatsiya texnologiyalari yo'nalishlari bundan mustasno). Nodavlat ta'lim tashkilotlarida masofaviy shaklda o'qitiladigan yo'nalish va mutaxassisliklar beriladigan litsenziyada alohida qayd etiladi.

O'quv jarayoni va nazorat

Masofaviy ta'lim talabasi quyidagi hollarda oliy ta'lim tashkilotiga shaxsan tashrif buyurishi shart:

• O'quv jarayoni boshlanishidan oldin — LMS platformasida ro'yxatdan o'tish uchun;
• Har semestr yakunida — yakuniy nazoratni topshirish uchun.

Yakuniy davlat attestatsiyasi, bitiruv malakaviy va magistrlik ishi himoyasi oliy ta'lim tashkilotida an'anaviy tarzda amalga oshiriladi. Jarayon Oliy ta'lim, fan va innovatsiyalar vazirligi hamda Ta'lim sifatini nazorat qilish davlat inspeksiyasi tomonidan monitoring qilinadi.

Cheklovlar buzilishining oqibatlari

Nizom talablari buzilishida aybdor shaxslar qonunchilikda belgilangan tartibda javobgar bo'ladi. Masofaviy ta'lim yo'nalishlari litsenziyada qayd etilishi va litsenziya talablari bajarilishi shart: Litsenziyalash, ruxsat berish va xabardor qilish tartib-taomillari to'g'risida'gi qonunga ko'ra litsenziya talablari muntazam buzib borilsa, litsenziyani to'xtatib turish yoki bekor qilish masalasi qo'yilishi mumkin.

Sirtqi, kechki va masofaviy ta'lim shakllari hamda ularning diplomi haqida sirtqi, kechki va masofaviy ta'lim diplomlarining kuchi haqidagi maqolamizda batafsil yozgan edik.