Navoiy bog’chasida bolalarni kaltaklagan tarbiyachi 3 yil 3 oyga qamaldi

Navoiy shahridagi xususiy bog'chalardan birida 1–3 yoshli bolalarni kaltaklab kelgan tarbiyachiga 3 yil 3 oy muddatga ozodlikdan mahrum qilish jazosi tayinlandi. Shuningdek, u 2 yil muddatga maktabgacha ta'lim muassasalarida tarbiyachi vazifasida ishlash huquqidan mahrum qilindi — bu haqda Daryo sud hujjatlari bilan tanishib xabar berdi.

Ish holati

2003-yilda tug'ilgan tarbiyachi 2025-yil dekabrdan 2026-yil aprelgacha xususiy bog'chada 1 yoshdan 3 yoshgacha bo'lgan bolalar guruhida ishlagan. U guruhdagi besh nafar bolani urib, ularga zo'rlik ishlatib kelgan, oqibatda bolalarga sog'liqning buzilishiga olib kelmagan yengil tan jarohatlari yetkazilgan.

7-aprel kuni yordamchi tarbiyachi bo'lgan xodim holatni videoga olib, oshkor qilgan. Uning so'zlariga ko'ra, mashg'ulot paytida ikki bola urishib qolgan va bundan jahli chiqqan tarbiyachi ularning yuziga urib, yerga uloqtirgan va tepgan. Keyinchalik bu videolar ota-onalardan biriga yetib borgan.

Ota-onalar va tekshiruv natijalari

Sudda kaltaklangan bolaning onasi farzandining xulqidagi o'zgarishlarni videolar tarqalishidan ancha oldin sezganini, biroq bunga jiddiy e'tibor bermaganini aytgan.

Oxirgi ikki oyda farzandim bog'chaga borishni xohlamay, injiqlik qilardi. Buni odatiy xarxasha deb o'ylaganman. Bir kuni oyog'ida ko'karish paydo bo'ldi. Nima bo'lganini so'raganimda, hali to'liq gapira olmasa ham, “urdi”, dedi.

Bolaning onasining sud majlisidagi ko'rsatmasi

Boshqa ota-onalar ham farzandlarining tanasida ko'karish va shilingan joylarni ko'rganini, ayrimlari bolasining ruhiy holatida o'zgarishlar kuzatilganini aytgan. Ota-onalar jarohatlar haqida so'raganida, tarbiyachi buni bolalarning yiqilgani yoki o'zaro urishgani bilan izohlab kelgan.

Holat yuzasidan tayinlangan psixologik tekshiruv xulosasida bolalarda tarbiyachi bilan bog'liq o'ta og'ir travmatik holat, qo'rquv va jismoniy zo'ravonlik alomatlari borligi tasdiqlangan. Sudlanuvchi sudda aybiga qisman iqror bo'lib, bolalarni urganini tan olgan, ammo bunga oilaviy kelishmovchiliklar sabab asabiyligi ta'sir qilganini va holat muntazam bo'lmaganini aytgan.

Sud hukmi

Jinoyat ishlari bo'yicha Navoiy shahar sudi uni Jinoyat kodeksining 110-moddasi 2-qismi “a”, “v” bandlari — qiynash — bilan aybdor deb topib, 3 yil 3 oy muddatga ozodlikdan mahrum qilish jazosini tayinladi hamda 2 yil muddatga maktabgacha ta'lim muassasalarida tarbiyachi vazifasida ishlash huquqidan mahrum qildi.

Sud jabrlanuvchilar va guvohlarning ko'rsatmalari, videotasvirlar, sud-tibbiy ekspertiza xulosalari hamda psixologik tekshiruv natijalarini aybni tasdiqlovchi dalillar sifatida baholagan.

Bog'chalardagi xavfsizlik va javobgarlik masalasi bo'yicha Buxorodagi sud hukmi va Andijondagi holat haqidagi materiallarimizni ham o'qishingiz mumkin.