Xotin-qizlar uchun grant tavsiyanomasiga qabul boshlandi
Ehtiyojmand oilalardagi xotin-qizlar uchun tavsiyanoma olish bo‘yicha arizalar qabuli boshlandi. Abituriyentlar hujjatlarini 8-iyunga qadar Yagona interaktiv davlat xizmatlari portali orqali onlayn topshirishi mumkin.
Har yili ushbu toifadagi xotin-qizlar uchun 2 mingta qo‘shimcha grant ajratilar edi. O‘tgan yildan boshlab kvotalar soni ikki baravar oshirilib, 4 mingta grant o‘rni ajratilmoqda.
Kimlarga tavsiyanoma beriladi?
Quyidagi mezonlardan biriga mos kelgan xotin-qizlarga tavsiyanoma beriladi:
- “Ijtimoiy reyestr”ga kiritilgan oilalardagi xotin-qizlar
- otasi, onasi yoki har ikkisi vafot etgan oilalardagi qizlar
- turmush o‘rtog‘i vafot etgan va voyaga yetmagan farzandini yolg‘iz tarbiyalayotgan ayollar
- nogironligi bo‘lgan farzandi bor ehtiyojmand oilalardagi ayollar
- ikki yoki undan ortiq farzandli, ijarada yashovchi yolg‘iz ayollarning qizlari
- ota-onasidan biri yoki har ikkisi I yoki II guruh nogironi bo‘lgan oilalardagi xotin-qizlar
Tavsiyanoma olish uchun yana qanday talab bor?
Talabgor:
- 11-sinf yoki
- o‘rta maxsus, kasb-hunar ta’limi muassasasini tugatgan bo‘lishi kerak.
Muhim jihati, tavsiyanoma soni cheklanmagan. Mezonga mos kelgan barcha talabgorlar tavsiyanoma olishi mumkin.
Tavsiyanoma ball qo‘shadimi?
Yo‘q. Bu eng ko‘p noto‘g‘ri tushuniladigan masalalardan biri.
Mazkur tavsiyanoma:
- qo‘shimcha ball bermaydi
- avtomatik tarzda grant yutib beradi degani emas
- 100 foiz o‘qishga kirishni kafolatlamaydi
Abituriyent baribir yetarli ball to‘plashi kerak bo‘ladi.
Tavsiyanoma qancha muddat amal qiladi?
Tavsiyanoma bir yil muddatga beriladi.
O‘tgan yili tavsiyanoma olib, o‘qishga kira olmagan xotin-qizlar joriy yilda yana qayta murojaat qilishi kerak.
5 yillik ish stajiga ega xotin-qizlar uchun alohida kvota
Mutaxassisligi bo‘yicha kamida 5 yil ish stajiga ega, lekin oliy ma’lumoti bo‘lmagan xotin-qizlar uchun ham alohida 500 ta kvota ajratiladi.
Mazkur toifa uchun arizalar 31-mayga qadar qabul qilinadi.
Muhim eslatma
Ikkala tavsiyanoma bir-biridan alohida hisoblanadi. Agar mezonlarga mos kelsa, bir abituriyent ikkala tavsiyanomani ham olishi mumkin.
Izohlar (0)
Izoh yozish uchun tizimga kiring.