Davlat texnikumlari huzurida talabalar startap loyihalari asosida “spin-off” korxonalarini tashkil etish tartibi belgilandi. Vazirlar Mahkamasining 2026-yil 29-sentyabrdagi 524-son qarori bilan tasdiqlangan tartibga ko‘ra, bunday korxonalar startap loyihalarini amalga oshirish uchun 1 milliard so‘mgacha grant olishi mumkin.
“Spin-off” korxonasi — yangi ishlanmalarga asoslangan startap loyihalari asosida mahsulot va xizmatlar ishlab chiqarish hamda bu jarayonga texnikum o‘quvchilarini jalb qilish maqsadida texnikum huzurida tashkil etiladigan yuridik shaxs. U texnikumda mavjud kasb va yo‘nalishlardan kelib chiqib ochiladi.
Korxonalar hudud ixtisoslashuvi asosida belgilanadi
Qaysi texnikum huzurida korxona tashkil etilishi hududning ixtisoslashuvidan kelib chiqib, Kasbiy ta’lim agentligi tomonidan belgilanadi. Loyihalarni amalga oshirish uchun mablag‘ Kasbiy ta’limni rivojlantirish jamg‘armasi hisobidan ajratiladi.
Grant olish uchun talab qilinadigan hujjatlar
Grant olish uchun korxona ariza va startap loyihasi bo‘yicha batafsil taqdimotni taqdim etadi. Shuningdek, kamida bir nafar pedagog yoki ishlab chiqarish ta’lim ustasi faoliyat yuritayotganini tasdiqlovchi hujjat hamda kamida 5 nafar texnikum o‘quvchisi bilan dual ta’lim bo‘yicha tuzilgan shartnoma nusxalari talab qilinadi.
Loyihalar 100 ballik tizimda baholanadi
Loyihalar Komissiya tomonidan 100 ballik tizim asosida baholanadi. Har bir yo‘nalish bo‘yicha alohida ball ajratilgan.
| Baholash mezoni | Ball |
|---|---|
| Innovatsionlik darajasi | 30 |
| Iqtisodiy samaradorlik | 25 |
| Bandlikka ta’siri | 20 |
| Eksport salohiyati | 15 |
| Ekologik ta’siri | 10 |
Grant olish uchun minimal o‘tish bali 71 ball etib belgilangan. 70 ball va undan past ball to‘plagan loyiha tanlovdan o‘tmagan hisoblanadi.
Korxonalar uchun beriladigan imtiyozlar
“Spin-off” korxonalariga texnikumlarning bo‘sh turgan bino, inshoot va maydonlari 5 yildan ortiq bo‘lmagan muddatga foydalanishga berilishi mumkin. Korxonalar ishlab chiqarishda sarflanadigan tabiiy gaz, suv va elektr energiyasi xarajatlarini alohida o‘rnatilgan hisoblagichlar ko‘rsatkichlari asosida o‘z hisobidan qoplaydi.
Korxonaning davlat ulushi 5 yil davomida xususiylashtirilmaydi. Bundan tashqari, bu ulushdan asosiy faoliyat yo‘nalishidan tashqari boshqa maqsadlarda foydalanish taqiqlanadi.
Bunday korxona texnikum o‘quvchisi uchun amaliy tajriba maydoni bo‘lib xizmat qiladi. Talaba o‘qish davomida real ishlab chiqarish jarayonida qatnashadi, dual ta’lim shartnomasi asosida esa ish haqi oladi.
Namunaviy korxonalar yil yakunigacha ishga tushiriladi
Qarorga ko‘ra, 2026-yil yakuniga qadar Qoraqalpog‘iston Respublikasi, viloyatlar va Toshkent shahrida kamida bittadan texnikumda namunaviy “spin-off” korxonasi ishga tushiriladi. Tartib texnikum o‘quvchilarining amaliy ko‘nikmalarini ishlab chiqarish bilan bog‘lashga qaratilgan.
