Talabalar shaharchasidagi yotoqxonadan kechasi 300 nafarga yaqin talaba chiqarilgani haqidagi xabarlar ijtimoiy tarmoqlarda tez tarqaldi. Oliy ta’lim, fan va innovatsiyalar vazirligi holat yuzasidan rasmiy munosabat bildirib, bino hali foydalanishga topshirilmaganini ma’lum qildi.
Hodisa 6-oktabr kuni kechqurun Toshkent davlat texnika universitetining davlat-xususiy sheriklik asosida qurilgan talabalar turar joyida yuz berdi. Vazirlik bayonotiga ko‘ra, talabalarning bir qismi obyektga belgilangan tartibga rioya qilinmagan holda, tegishli yo‘llanmasiz joylashtirilgan.
Obyekt rasman foydalanishga topshirilmagan
Vazirlikning qayd etishicha, Toshkent shahri Talabalar shaharchasida qurilgan bu turar joy hali rasman foydalanishga topshirilmagan. Obyektning kadastr hujjatlari rasmiylashtirilmagan, undan foydalanish uchun zarur ruxsatlar ham olinmagan.
Bundan tashqari, binoda issiq suv va isitish tizimlari to‘liq ishga tushirilmagan, obyektning rasmiy ochilish marosimi ham hali o‘tkazilmagan. Ya’ni talabalar qurilishi to‘liq yakunlanmagan binoga joylashtirilgan.
Yo‘llanmasiz joylashtirish aniqlangan
Tekshiruv davomida nafaqat TDTU talabalari, balki boshqa oliy ta’lim tashkilotlarining talabalari ham shu yotoqxonaga joylashtirilgani ma’lum bo‘ldi. Xorijiy talabalar ham tegishli ruxsat hujjatlarisiz, rasman topshirilmagan obyektda joylashtirilgan.
Amaldagi tartibga ko‘ra, talabalar turar joyiga joylashish uchun talaba Davlat xizmatlari markazi yoki my.gov.uz orqali ariza topshirib, belgilangan tartibda yo‘llanma olishi kerak. Aynan shu yo‘llanma joylashish uchun asosiy hujjat hisoblanadi.
Talabalar vaqtincha boshqa turar joylarga ko‘chirildi
Mazkur holat aniqlangach, talabalarning xavfsizligi va ular uchun zarur sharoitlarni ta’minlash maqsadida barcha talabalar obyektdan chiqarilib, Toshkent davlat texnika universitetining mavjud bo‘sh talabalar turar joylariga vaqtincha joylashtirildi.
Oliy ta’lim, fan va innovatsiyalar vazirligi
Boshqa oliy ta’lim tashkilotlarining talabalari esa tegishli mas’ullar orqali o‘z ta’lim tashkilotlariga qaytarildi. Xorijiy talabalar ham xavfsizlik choralari doirasida obyektdan chiqarilgan.
Ayni paytda turar joyning kadastr hujjatlarini rasmiylashtirish va foydalanish uchun zarur ruxsatlarni olish bo‘yicha ishlar davom etmoqda. Vazirlik holat yuzasidan rasmiy bayonot e’lon qildi.
Yotoqxonaga rasmiy joylashish tartibi
Yotoqxonaga joylashish tartibsiz amalga oshirilsa, talaba kutilmaganda turar joysiz qolish xavfiga tushadi. Rasmiy yo‘l bitta: ariza, ro‘yxat va yo‘llanma. Shu bosqichlardan o‘tgan talaba joylashish huquqini tasdiqlovchi hujjatga ega bo‘ladi.
Yotoqxona ololmagan talabalar uchun esa alohida yordam tartibi mavjud. Ijara to‘lovining bir qismini qoplash bo‘yicha ariza topshirish muddati uzaytirilgan edi, bu imkoniyat turar joy muammosini yumshatishga qaratilgan.
