2026-yilning birinchi yarim yilligida ta'lim tizimida qator natijalarga erishildi. Xususan, ta'lim sohasiga hissa qo'shgan 1 500 nafar o'qituvchiga 120 milliard so'm mablag' ajratildi.
Bu haqda O'zbekiston 24 telekanali xabar berdi. Oliy Majlis Qonunchilik palatasining Fan, ta'lim, madaniyat, sport va yoshlar masalalari qo'mitasi yig'ilishida vazirlik va idoralarning davlat budjeti mablag'laridan foydalanishi yuzasidan hisobotlar taqdimoti bo'lib o'tdi.
Maktabgacha ta'lim sohasidagi natijalar
Reklama
Yig'ilishda maktabgacha va umumiy o'rta ta'lim tizimidagi xarajatlar hamda erishilgan natijalar muhokama qilindi. 2026-yilning dastlabki yarmida maktabgacha ta'lim sohasida 700 ta yangi nodavlat maktabgacha ta'lim tashkiloti tashkil etilgan.
Ularni qo'llab-quvvatlash maqsadida davlat budjetidan 2 trillion 75,9 milliard so'm subsidiya ajratilgan. Natijada maktabgacha ta'lim bilan qamrov darajasi 78 foizda saqlab qolingan.
O'qituvchilarning 76,4 foizi sertifikatga ega
Umumiy o'rta ta'lim tizimida faoliyat yuritayotgan mahalliy o'qituvchilarning 76,4 foizi milliy va xalqaro sertifikatlarga ega ekani ta'kidlangan. Ta'lim sohasiga qo'shgan hissasi uchun esa 1 500 nafar o'qituvchiga 120 milliard so'm mablag' ajratilgan.
Avvalroq boshlang'ich sinf o'qituvchilari uchun milliy sertifikat va ustama tizimi joriy etilishi haqida xabar berilgan edi. Sertifikatga ega bo'lgan pedagoglar ustama olish huquqiga ega.
O'quvchilar yutug'i va boshqa sohalar
Prezident ijod maktablari va ixtisoslashtirilgan maktablarning 226 nafar bitiruvchisi dunyoning TOP-300 reytingidan joy olgan nufuzli oliy ta'lim muassasalariga qabul qilingan.
Yig'ilishda madaniyat va turizm sohalaridagi budjet mablag'larining o'zlashtirilishi ham tahlil qilindi. Madaniyat vazirligi tizimiga respublika budjetidan 854,9 milliard so'm ajratilgan bo'lib, uning 95 foizi o'zlashtirilgan. Turizm qo'mitasida daromadlar prognozi 90,6 foizga, xarajatlar ijrosi esa 81,6 foizga ta'minlangan. Bu haqda Ta'lim xabarlari xabar berdi.
Izohlar (0)
Izoh yozish uchun tizimga kiring.