Shaxsiy yozishmalar — kuchli qurol. Buxoroda bu qurolni qo'lga olgan ikki talaba qizning hikoyasi shu bilan tugadi: ular 500 dollar evaziga 4 yil ozodlikni cheklash jazosiga hukm qilindi.
Ishni ko'rib chiqqan Buxoro shahar sudi 18 va 19 yoshli ikki qizni aybdor deb topdi. Ikkalasi ham xususiy universitetning 2-bosqich talabalari — biri 2006-yilda, ikkinchisi 2007-yilda tug'ilgan.
Tovlamachilik qanday uyushtirilgan?
Reklama
Sud hujjatiga ko'ra, ular 2026-yil aprel-may oylarida bir fuqaro bilan tanishib, uning shaxsiy mazmundagi yozishma va suhbatlarini telefonlariga yozib olgan. Keyinchalik ushbu ma'lumotlarni uning ish joyi va oila a'zolariga oshkor qilish bilan qo'rqitib, 500 dollar talab qilishgan.
Ammo reja amalga oshmadi — 3-iyun kuni Buxoro shahridagi mehmonxonaga pul olish uchun kelgan ularni xizmatchilar kutib turgan edi.
Sud qanday hukm chiqardi?
Sudda har ikki qiz aybiga to'liq iqror bo'lib, qilgan ishidan pushaymonligini bildirgan. Ularning yoshi, talabaligi, ilgari sudlanmagani va aybiga iqror bo'lgani jazoni yengillashtiruvchi holat sifatida inobatga olingan.
Natijada ular Jinoyat kodeksining 165-moddasi 2-qismi «v» bandi bilan aybdor deb topilib, har biriga 4 yil ozodlikni cheklash jazosi tayinlandi. Jazoni yashash joyida o'tash belgilangan. Shuningdek, sud ruxsatisiz yashash joyini o'zgartirish va Buxoro viloyatidan tashqariga chiqish taqiqlandi.
Avvalroq talaba jinoyati oqibatlari haqida yozgan edik. InfoEdu.uz ta'lim sohasidagi qoidabuzarliklar bo'yicha yangiliklarni yoritishda davom etadi.
Izohlar (0)
Izoh yozish uchun tizimga kiring.