OTM 2026: Qabulga 2 oy qoldi. Nimalarni bilish shart?

OTMga kirish imtihonlari yaqin: 2026-yilgi qabulda bizni nimalar kutmoqda?

Vaqt yugurib o'tyapti. Oliy ta’lim muassasalariga hujjat topshirish boshlanishiga atigi ikki oy vaqt qoldi. Agar siz hali ham eski tizim bo'yicha "hujjat topshirib, keyin imtihonga kiraman" deb o'ylayotgan bo'lsangiz, shoshilmang. O'tgan yildan boshlab joriy etilgan ikki bosqichli tizim bu yil ham abituriyentlar uchun asosiy qoida bo'ladi.

Xo'sh, bu jarayon aslida qanday ishlaydi va adashib qolmaslik uchun nimalarga e'tibor berish kerak? Keling, hammasini bafamja ko'rib chiqamiz.

Birinchi bosqich: Faqat yo‘nalish emas, fan tanlanadi

Taxminan 5-iyundan 25-iyungacha davom etadigan dastlabki bosqichda siz hali qaysi universitetda o‘qishingizni tanlamaysiz. Bu bosqichda asosiysi — fanlar majmuasi.

Siz tizimdan ro'yxatdan o'tasiz va qaysi fanlardan imtihon topshirishingizni belgilaysiz. Masalan, matematika va ingliz tili yoki tarix va ona tili. Shuningdek, test topshirish hududini (o'zingizga qulay viloyatni) tanlab olasiz. Tamom, hozircha sizning vazifangiz faqat yaxshi ball to'plashga tayyorgarlik ko'rish.

Ikkinchi bosqich: Ballarni ko'rgach qaror qabul qiling

Eng qiziqarli joyi imtihonlardan keyin boshlanadi. Test natijalari to‘liq e’lon qilingach, sizga 15 kun vaqt beriladi. Mana shu vaqt ichida qo'lingizdagi ballga qarab:

• Qaysi OTMga kirish imkoniyati yuqoriligini chamalaysiz;
• Beshta ta’lim yo‘nalishini tanlaysiz;
• Ta’lim shaklini (kunduzgi yoki kechki) belgilaysiz.

Bu tizimning eng katta plyusi — siz "ko'r-ko'rona" hujjat topshirmaysiz. To'plagan balingiz qaysi oliygohga yetishini bilib turib, aniqroq tanlov qilasiz.

Kollej va texnikumlar haqida unutmang

Agar natijalaringiz OTMga kirish uchun yetarli bo'lmasa yoki ma'lum bir kasbni tezroq egallamoqchi bo'lsangiz, kollej va texnikumlar eshigi siz uchun ochiq. OTMlarning yakuniy natijalari (mandat) chiqqanidan keyin 10 kun ichida ularga hujjat topshirish imkoningiz bo'ladi.

Xulosa o'rnida: Hozirgi vazifangiz — hujjat topshirish tartibidan vahima qilmay, bor e'tiboringizni testlarga tayyorlanishga qaratishdir. Unutmang, ikki oydan keyin mas'uliyatli palla boshlanadi!