2026-yildan maktabga ishga kirgan magistrlarga 1-malaka toifasi beriladi

Umumta'lim maktablariga ishga qabul qilinayotgan yosh mutaxassislar uchun 2026-yildan yangi tartib amal qiladi. Magistratura darajasiga ega bitiruvchilar 1-malaka toifasini attestatsiyasiz, to'g'ridan-to'g'ri oladi. Imtiyozli diplom bilan tamomlagan bakalavrlar esa ish faoliyatini boshlashi bilan 2-malaka toifasiga ega bo'ladi. O'qituvchilar uchun davlat xizmatlari bo'yicha to'lovlar ham 2 baravarga kamaytiriladi.

Magistr bitiruvchilar uchun imtiyoz

Yangi tartibga ko'ra, 2026-yildan boshlab umumta'lim maktablariga ishga qabul qilinayotgan magistr darajasiga ega bitiruvchilar 1-malaka toifasini avtomatik ravishda oladi. Ya'ni toifa uchun alohida attestatsiya sinovidan o'tish talab qilinmaydi.

Imtiyoz birinchi bor ta'lim tashkilotiga ishga kirgan bitiruvchilarga tegishli. Murojaat pedagog.uzedu.uz platformasi, davlat xizmatlari markazlari yoki my.gov.uz portali orqali yuboriladi. Bitiruvchilar uchun toifa berish shartlari haqida avvalroq yozgan edik.

Imtiyozli diplomli bakalavrlar uchun tartib

Bakalavriatni imtiyozli (qizil) diplom bilan tamomlagan yosh mutaxassislar ham imtiyozga ega: ish faoliyatini boshlashi bilan ularga 2-malaka toifasi beriladi. Odatda bu toifa attestatsiya natijasida olinadi, bitiruvchi uchun esa bu bosqich chetlab o'tiladi.

Ariza “To‘g‘ridan-to‘g‘ri” murojaat turi bo'yicha yuboriladi va unda “Imtiyozli bakalavr diplomi” bandi belgilanadi.

Davlat xizmatlari to'lovlarining kamaytirilishi

Uchinchi o'zgarish o'qituvchilarning moliyaviy yukini yengillashtiradi: davlat xizmatlari bo'yicha to'lovlar 2 baravarga kamaytiriladi.

Bu tartib attestatsiya va kasbiy sertifikatlash sinovlarida allaqachon amal qilmoqda: ishtirok yig'imi BHMning to'liq miqdori emas, 50 foizi miqdorida undiriladi. Majburiy attestatsiyada birinchi marta qatnashayotgan pedagoglar uchun sinovlar bepul o'tkaziladi. To'lov tartibi haqida avvalroq yozgan edik.