Germaniya va boshqa Yevropa mamlakatlarida ishlashni rejalashtirayotgan O'zbekiston fuqarolariga til o'rganish, kasbiy tayyorgarlik hamda yo'l xarajatlarini qoplash uchun 5 ming yevrogacha maqsadli ssuda ajratish taklif qilinmoqda. Adliya vazirligining normativ-huquqiy hujjatlar loyihalari muhokamasi portaliga tegishli qaror loyihasi joylashtirildi.
Loyiha doirasida Qashqadaryo viloyati hokimligi huzuridagi Kasbiy ta'lim va mehnat migratsiyasini rivojlantirish jamg'armasining maqomi hamda faoliyat tartibi belgilanmoqda. Ushbu tashabbus yoshlarni xalqaro standartlar bo'yicha tayyorlash va ularni tashkillashtirilgan holda xorijga ishga yuborish tizimini yo'lga qo'yishga qaratilgan.
Maqsadli ssuda ajratish shartlari va bosqichlari
Reklama
Hujjatga ko'ra, saralash bosqichlaridan muvaffaqiyatli o'tgan fuqarolarga 5 ming yevro ekvivalentigacha maqsadli ssuda beriladi. Mablag'lar fuqaro va Jamg'arma o'rtasida tuziladigan maqsadli qarz shartnomasi asosida ajratiladi. Ssuda uch alohida bosqichda berilishi nazarda tutilgan:
- Tayyorgarlik bosqichi — nomzod o'quv dasturiga qabul qilinib, shartnoma imzolangach ajratiladi;
- Jo'nab ketish bosqichi — xorijiy ish beruvchi bilan mehnat shartnomasi tuzilib, til sertifikati olinganda beriladi;
- Moslashish bosqichi — fuqaro xorijga yetib borgach, zarur hollarda moliyaviy ko'mak sifatida taqdim etiladi.
Ssuda oluvchi nomzod uchun doimiy daromadga va ijobiy kredit tarixiga ega bo'lgan fuqaroning kafilligi talab etiladi. Fuqaro xorijda mehnat faoliyatini boshlagan sanadan e'tiboran 12 oy ichida ssuda summasini to'liq qaytarishi shart.
Dastur ishtirokchilariga qo'yiladigan talablar
O'quv dasturini muvaffaqiyatli tamomlab, til sertifikatini olgan nomzodlar Jamg'arma taklif etgan ish o'rniga joylashishi yoki mustaqil ravishda xorijiy ish beruvchi topishi mumkin. Mustaqil ish topish ssudani qaytarish majburiyatini bekor qilmaydi.
Shu bilan birga, ayrim holatlarda fuqaro dastur ishtirokchilari safidan chiqarilishi mumkin. Darslarga sababsiz qatnashmaslik, o'quv dasturini o'zlashtira olmaslik, soxta hujjat taqdim etish yoki shartnoma talablarini buzish shular jumlasidandir. Ishtirokchilar safidan chiqarilish ham ajratilgan ssudani qaytarish majburiyatini bekor qilmaydi.
Hududiy texnikumlarda yangi haydovchilik yo'nalishlari
Qaror loyihasida 2026/2027-o'quv yilidan boshlab Qoraqalpog'iston Respublikasi va 6 ta viloyatdagi (Farg'ona, Xorazm, Samarqand, Qashqadaryo, Surxondaryo, Toshkent) texnikumlarda yangi yo'nalishlar ochish taklif etilmoqda. Ushbu muassasalarda yuk va yo'lovchi avtotransportlarini boshqarish bo'yicha D va CE toifali haydovchilarni tayyorlash yo'lga qo'yiladi.
Izohlar (0)
Izoh yozish uchun tizimga kiring.
Hozircha izohlar yo‘q.
Birinchi bo‘lib izoh qoldiring