2026-yil 5-iyuldan texnikumlarni muvaffaqiyatli tamomlagan bitiruvchilarni oliy ta’lim tashkilotlarining bakalavriat bosqichiga 2-kursdan suhbat asosida qabul qilish jarayoni boshlandi.
Nomzodlar hujjatlarini 25-iyul (shu kuni ham) qadar my.edu.uz platformasi orqali onlayn topshirishlari mumkin.
Ariza qanday topshiriladi?
Reklama
Ro‘yxatdan o‘tish jarayoni to‘liq elektron shaklda amalga oshiriladi.
Ariza topshirishda:
- diplomning asl nusxasini yuklash talab etilmaydi;
- shaxsni tasdiqlovchi ma’lumotlarni kiritish kifoya;
- qolgan zarur ma’lumotlar tizim tomonidan avtomatik shakllantiriladi.
Bu jarayon abituriyentlarga hujjat topshirishni yanada qulaylashtiradi.
Kimlar "texnikumni muvaffaqiyatli tamomlagan" hisoblanadi?
Mazkur imkoniyatdan quyidagi talablarga javob beradigan bitiruvchilar foydalanishi mumkin:
- barcha semestrlar yakunida baholari 4 (yaxshi) va 5 (a’lo) bo‘lishi;
- baholarning kamida 50 foizi "5" bahodan iborat bo‘lishi;
- tibbiyot yo‘nalishlari bitiruvchilari uchun esa "5" baholar ulushi kamida 85 foizni tashkil etishi.
Suhbatdan o‘tish uchun necha ball kerak?
Suhbat yakunida komissiya a’zolari qo‘ygan ballarning o‘rtacha ko‘rsatkichi 67 ball yoki undan yuqori bo‘lsa, abituriyent suhbatdan muvaffaqiyatli o‘tgan hisoblanadi.
Bunday nomzodlar to‘lov-kontrakt asosida bakalavriatning 2-kursiga talabalikka tavsiya etiladi.
Ushbu tartib qaysi OTMlarga tatbiq etilmaydi?
2-kursdan suhbat asosida qabul qilish quyidagi ta’lim muassasalariga nisbatan qo‘llanilmaydi:
- oliy harbiy ta’lim muassasalari;
- oliy harbiylashtirilgan ta’lim muassasalari;
- Toshkent davlat yuridik universiteti;
- O‘zbekistonda faoliyat yuritayotgan xorijiy oliy ta’lim tashkilotlari va ularning filiallari;
- nodavlat oliy ta’lim tashkilotlari va ularning filiallari.
Muhim muddat
Texnikum bitiruvchilari hujjatlarini 2026-yil 25-iyulga qadar topshirishlari kerak. Belgilangan muddatdan keyin yuborilgan arizalar qabul qilinmaydi.
Izohlar (0)
Izoh yozish uchun tizimga kiring.