Maktabgacha, umumiy o‘rta va maktabdan tashqari ta’lim tashkilotlari pedagog kadrlarining attestatsiyasi Maktabgacha va maktab ta’limi vazirining 2026-yil 4-sentabrdagi 334-son buyrug‘i bilan tasdiqlangan yo‘riqnoma asosida o‘tkaziladi.
Attestatsiya ikki bosqichda o‘tkaziladi
Musiqa madaniyati va jismoniy tarbiya fani o‘qituvchilaridan tashqari pedagoglar birinchi bosqichda mutaxassislik fani va kasb standarti bo‘yicha bilim darajasi, ikkinchi bosqichda pedagogik mahorati bo‘yicha baholanadi.
| Bosqich | Topshiriqlar soni | Har bir topshiriq | Maksimal ball |
|---|---|---|---|
| 1-bosqich — mutaxassislik fani | 35 ta | 2 ball | 70 ball |
| 1-bosqich — kasb standarti | 5 ta | 2 ball | 10 ball |
| 2-bosqich — pedagogik mahorat | 10 ta | 2 ball | 20 ball |
| Jami | 50 ta | — | 100 ball |
Musiqa madaniyati va jismoniy tarbiya fani o‘qituvchilari uchun alohida tartib belgilangan: mutaxassislik fanidan 35 ta, kasbiy standart bo‘yicha 5 ta, jami 40 ta topshiriq beriladi va har bir to‘g‘ri javob 1 ball bilan baholanadi. Bu fanlar bo‘yicha amaliy (ijodiy) imtihonlarni o‘tkazish tartibini Maktabgacha va maktab ta’limi vazirligi tegishli vazirliklar bilan belgilaydi.
Alohida holatlar
- oliy ma’lumotga ega bo‘lmagan pedagoglarga malaka toifalari berilmaydi: 55 ball va undan yuqori natija — attestatsiyadan o‘tgan va lavozimi saqlangan, 55 balldan kam natija — attestatsiyadan o‘tmagan, o‘qituvchi lavozimiga muvofiq emas deb hisoblanadi;
- tegishli sertifikatga ega pedagoglar birinchi bosqich malaka sinovidan ozod etiladi, biroq ikkinchi bosqichda ishtirok etishi majburiy: ularga 10 ta topshiriq va 20 daqiqa vaqt ajratiladi.
Test jarayoni va taqiqlangan buyumlar
Test sinovlari maxsus jihozlangan kompyuter xonalarida o‘tkaziladi. Pedagog ish joyini o‘zi tanlamaydi: raqami ko‘rinmaydigan kartochkalardan biri tasodifiy tanlanadi va u qaysi kompyuterda test topshirishni belgilaydi. Test oldidan shaxs Face ID orqali identifikatsiya qilinadi; ikki urinishdan keyin ham tasdiqlanmasa, ma’lumotlar JSHSHIR orqali aniqlashtiriladi.
- kitob, daftar, ruchka, qalam, soat, pardoz buyumlari, sumka, xalta, qog‘oz, mobil telefon, quloqchin, noutbuk va boshqa elektron qurilmalar;
- smart texnologiyali ko‘zoynak, shpargalka, ayrim turdagi suv idishlari, o‘ramli yeguliklar, sovuq qurol va tig‘li buyumlar, avtomashina pulti.
Quyidagilarni olib kirishga ruxsat etiladi: oddiy ko‘zoynak, shaffof va yorliqsiz idishdagi suv, astma ingalyatori, kattalashtiruvchi lupa va boshqa optik vositalar, shaxsni tasdiqlovchi hujjat, qo‘ltiqtayoq, nogironlik aravachasi, hassa va tibbiy niqob. Eshitish apparatidan foydalanadigan shaxslar uni tegishli nogironlik hujjatini ko‘rsatgan holda olib kiradi. Qoralama qog‘ozlarni auditoriyadan olib chiqish mumkin emas.
Tartib-qoidani buzgan pedagokka avval bir marta ogohlantirish beriladi. Takroriy qoidabuzarlik tasdiqlansa, dalolatnoma rasmiylashtiriladi va pedagog test sinovidan chetlashtiriladi; u qaror yuzasidan belgilangan tartibda shikoyat qilish huquqiga ega.
Boshqa hududda topshirish va apellyatsiya tartibi
Doimiy yoki vaqtincha yashash hududidan boshqa joyda test topshirishga faqat asosli sabab va uni tasdiqlovchi hujjatlar bo‘lgandagina ruxsat beriladi: harbiy xizmatchining turmush o‘rtog‘i boshqa hududda yashashi, homiladorlik yoki tug‘ruq ta’tili, xizmat safari, ta’til, davolanish va boshqa hujjatlashtirilgan holatlar. Buning uchun yozma ariza va tibbiy ma’lumotnoma, chipta yoki xizmat safari buyrug‘i kabi hujjatlar taqdim etiladi. Og‘zaki murojaat asosida test joyi o‘zgartirilmaydi.
Test davomida savol yuzasidan e’tiroz platformadagi “Savolga e’tiroz bildirish” funksiyasi orqali bildiriladi. Natijalar e’lon qilingan kundan boshlab 10 kun ichida pedagoglar apellyatsiya komissiyasiga yozma yoki elektron shaklda murojaat qilishi mumkin; elektron shikoyat pedagog.uzedu.uz platformasidagi shaxsiy kabinet orqali yuboriladi.
Apellyatsiya komissiyasi attestatsiya boshlanguniga qadar vazir buyrug‘i bilan 7 kishidan iborat tarkibda tuziladi. Komissiya natijani o‘zgarishsiz qoldirishi, aniqlangan xatolik yoki noto‘g‘ri baholash holatlarida natijani o‘zgartirishi, tashkiliy-texnik kamchiliklar aniqlansa testni qayta topshirishni tashkil etishi mumkin. Ekspertlar xulosasi pedagogning shaxsiy kabinetiga yuboriladi, qaror yuzasidan sudga shikoyat qilish huquqi ham saqlanadi.
Izohlar (0)
Izoh yozish uchun tizimga kiring.
Hozircha izohlar yo‘q.
Birinchi bo‘lib izoh qoldiring