Namangan viloyati Davlatobod tumanida ta'lim muassasalariga isitish qozoni yetkazib berish bo'yicha tuzilgan shartnoma talablari buzilib, 1 mlrd so'm byudjet mablag'i o'zlashtirilgan. Holat yuzasidan jinoyat ishi qo'zg'atilgan.
Bu haqda Bosh prokuratura huzuridagi Departamentning Namangan viloyati boshqarmasi o'tkazgan tergovga qadar tekshiruvi natijasida ma'lum qilindi.
Shartnoma talablari buzilgan
Tekshiruvda Davlatobod tumani Maktabgacha va maktab ta'limi bo'limi mas'ul shaxslari boshqa fuqarolar bilan til biriktirib, tumandagi ta'lim muassasalariga isitish qozoni yetkazib berish shartnomasiga muvofiq “ABS” rusumli qozonlarni xarid qilishi lozim bo'lgani aniqlangan.
Biroq amalda “LES” rusumli isitish qozonlari sotib olingan. Natijada 1 mlrd so'm byudjet mablag'i o'zlashtirish yoki rastrata yo'li bilan talon-toroj qilingan.
Jinoyat ishi va tergov harakatlari
Mazkur holat yuzasidan Jinoyat kodeksining 167-moddasi (o'zlashtirish yoki rastrata yo'li bilan talon-toroj qilish) bilan jinoyat ishi qo'zg'atilgan. Hozirda tergov harakatlari olib borilmoqda.
Avvalroq Namanganda bog‘cha rahbaridan pora talab qilgan mansabdorlarga jinoyat ishi qo'zg'atilgani haqida ham xabar berilgandi.
