Surxondaryo viloyati Jarqoʻrgʻon tumanida navbatdagi korrupsion holat fosh etildi. Davlat maktabgacha taʻlim tashkilotlariga oziq-ovqat mahsulotlari yetkazib beruvchi xususiy tadbirkordan 12 million soʻm pora talab qilib, qoʻlga olingan shaxsga nisbatan jinoyat ishi qoʻzgʻatildi. Bu haqda Surxondaryo viloyati IIB maʻlumot berdi.
Avvalroq Namanganda ham bogʻcha rahbaridan pora talab qilgan mansabdorlar jinoyat ishi qoʻzgʻatilgani haqida yozgan edik.
Hodisa tafsilotlariga koʻra, fuqaro Murodov huquq-tartibot idoralariga murojaat qilib, oziq-ovqat mahsulotlari qabul qilinganligini tasdiqlovchi dalolatnoma va hisobvaraq-fakturalarga imzo va muhr qoʻyib berish evaziga undan noqonuniy pul talab qilinayotganini maʻlum qilgan.
Tezkor tadbir va qoʻlga olish
Murojaat asosida viloyat IIB tezkor qidiruv xizmati, Jinoyat qidiruv boshqarmasi Korrupsiyaga qarshi kurashish boʻlimi va Jarqoʻrgʻon tumani huquq-tartibot organlari hamkorlikda tezkor tadbir oʻtkazdi. 1997-yilda tugʻilgan gumon qilinuvchi “Toʻshmurod oq oq” MChJdan 7 million soʻmdan, jami 12 million soʻm pora olayotgan vaqtda ashyoviy dalillar bilan qoʻlga olingan.
Gumon qilinuvchi oʻz xizmat mavqeidan foydalanib, nafaqat bitta, balki bir nechta davlat maktabgacha taʻlim tashkilotiga yetkazib berilgan mahsulotlar boʻyicha qabul dalolatnomalariga imzo chekish uchun pora talab qilgan.
Hozirda holat yuzasidan Oʻzbekiston Respublikasi Jinoyat kodeksining 215-moddasi (Pora olish) 2-qismi bilan jinoyat ishi qoʻzgʻatilgan va tergov harakatlari olib borilmoqda.
InfoEdu.uz taʻlim tizimidagi korrupsion holatlar va qonunbuzarliklarni muntazam yoritib boradi.
Reklama
Izohlar (0)
Izoh yozish uchun tizimga kiring.