Jizzax davlat pedagogika universitetida navbatdagi korrupsion holat fosh etildi. Universitet dekan oʻrinbosari talabani yakuniy davlat imtihonidan oʻtkazib berish evaziga 500 AQSH dollari talab qilgani uchun huquq-tartibot idoralari tomonidan qoʻlga olindi.
Maʻlumotlarga koʻra, mansabdor talabalardan biriga imtihondan muvaffaqiyatli oʻtishiga yordam berishini aytib, buning evaziga pul talab qilgan. Talaba bu holat yuzasidan huquqni muhofaza qiluvchi organlarga murojaat qilgan. Bu haqda ijtimoiy tarmoqlarda xabar berildi.
Oʻtkazilgan tezkor tadbir davomida dekan oʻrinbosari kelishilgan pulning bir qismi — 2 million soʻmni olayotgan vaqtida ashyoviy dalillar bilan qoʻlga olingan. Hozirda holat yuzasidan tergovga qadar tekshiruv ishlari olib borilmoqda.
Bu kabi holatlar oliy taʻlim tizimida korrupsiyaga qarshi kurash hali ham dolzarbligicha qolayotganini koʻrsatmoqda. Ayni paytda talabalarning oʻz haq-huquqlarini bilishi va qonuniy yoʻl bilan himoya qilishi muhim ahamiyat kasb etadi.
InfoEdu.uz taʻlim sohasidagi korrupsion holatlar va qonunbuzarliklarni yoritishda davom etadi.
Reklama
Izohlar (0)
Izoh yozish uchun tizimga kiring.