Anomal issiqda yopilgan bog’cha xodimlariga ish haqi to’liq to’lanadi

Anomal issiq havo sabab ayrim hududlarda davlat bog'chalari faoliyati vaqtincha to'xtatilgan bir paytda, Maktabgacha va maktab ta'limi vazirligi muhim ko'rsatma bilan chiqdi. Bog'cha xodimlarining ish haqi to'liq saqlab qolinadi, ota-onalardan esa farzandi bog'chaga kelmagan kunlar uchun to'lov undirilmaydi. Avvalroq Toshkent va Buxoroda issiq sabab barcha bog'chalar vaqtincha yopilgani haqida xabar berilgandi.

Xodimlar uchun ish haqi kafolati

Vazirlik ko'rsatmasiga ko'ra, bog'chalar faoliyati vaqtincha to'xtatilgan davrda xodimlarga ish haqi to'liq miqdorda hisoblanadi. Bu Mehnat kodeksining 266-moddasiga asoslanadi — mazkur moddada ish beruvchining aybi bilan bekor turib qolingan vaqt uchun xodimga tarif stavkasining kamida uchdan ikki qismi miqdorida haq to'lanishi belgilangan. Vazirlik esa ushbu holatda xodimlar foydasiga to'liq ish haqi to'lanishini kafolatlagan.

Ota-onalar to'lovi qayta hisoblanadi

Bola bog'chaga uzrli sabab bilan kelmagan kunlar uchun ota-onalardan to'lov undirilmasligi Adliya vazirligida 2016-yil 23-avgustda 2821-son bilan ro'yxatdan o'tgan nizomda belgilangan. Vazirlik ko'rsatmasiga binoan, anomal issiq sabab bog'chalar yopilgan davr ham uzrli sabab sifatida baholanadi. Agar to'lov oldindan amalga oshirilgan bo'lsa, summa keyingi oy hisobidan chegirib qolinadi.

Vazirlik hududiy boshqarmalarga mazkur topshiriqlarning o'z vaqtida bajarilishini ta'minlash va ijrosini nazoratga olish yuzasidan tegishli ko'rsatmalar bergan. Ta'lim sohasidagi eng muhim yangiliklarni InfoEdu.uz orqali muntazam kuzatib boring.