Prezident Shavkat Mirziyoyev Toshkent shahrida mahallalarni obodonlashtirish, yangi maktab va bog'chalar qurish hamda shahar muhitini rivojlantirishga qaratilgan loyihalar taqdimoti bilan tanishdi. Bu haqda davlat rahbari matbuot xizmati xabar berdi, Kun.uz tadbir tafsilotlarini yoritdi.
Poytaxtda aholi o'sishi bilan o'quvchi o'rinlari tanqisligi ham ortib bormoqda. 2025–2026-o'quv yilida tanqislik 141 ming o'rinni tashkil etgan bo'lsa, keyingi besh yilda o'quvchilar soni 71 mingtaga ko'payishi hisobiga 2030–2031-o'quv yiliga borib bu ko'rsatkich 212 mingga yetishi mumkin.
Shu bois 2030-yilgacha respublika byudjeti hisobidan 48 mingta, mahalliy byudjet hisobidan 78 mingta yangi o'quvchi o'rni yaratish rejalashtirilgan. Natijada maktablar yuklamasi hozirgi 1,4 koeffitsiyentdan 2030-yilda 1,2 gacha pasayadi.
Maktablar uchun tayyorlangan loyihalar
2026–2027-o'quv yili uchun umumiy maydoni 64,6 ming kvadrat metr bo'lgan, jami 38 ming o'rinli 24 ta yangi maktab loyihasi tayyorlangan. Namunaviy loyihalarga 17 ta yangi imkoniyat qo'shilmoqda: qo'shimcha o'quv maydonlari, kutubxona, sport va madaniyat tadbirlari uchun moslashuvchan zallar, o'qituvchilar uchun qulay xonalar ko'zda tutilgan.
Loyihalarda pandus va liftlar, inklyuziv ta'lim xonalari, tibbiy xonalar, xavfsizlik va energiya tejamkorlik yechimlari ham nazarda tutilgan. Harakat va suv datchiklari hisobiga elektr sarfi 20 foizgacha, suv sarfi 10 foizgacha tejaladi. Yangi yechimlar yer maydonini 50 foiz tejash, sport maydonlarini uch barobar kengaytirish imkonini beradi, namunaviy loyihalar samaradorligi 40 foizga oshiriladi.
Bog'cha qamrovi 92 foizga yetkaziladi
Shaharda 3–7 yoshli bolalar soni 253 mingtani tashkil etadi. Ularning maktabgacha ta'lim bilan qamrovi 79,2 foiz, o'rinlar tanqisligi esa 65 mingta. Shu bois 2030-yilgacha respublika byudjetidan 8 mingta, mahalliy byudjetdan 32 mingta qo'shimcha bog'cha o'rni yaratiladi. Natijada 2030-yilda qamrov 92 foizga yetkaziladi.
2026–2027-o'quv yili uchun jami 16 ming o'rinli 28 ta yangi bog'chaning besh turdagi loyihasi tayyorlangan. Namunaviy loyihaga 14 ta yangi yechim kiritilmoqda: sensor va logoped xonalari, psixologik-pedagogik yordam joylari, tibbiy blok, videokuzatuv, quyosh panellari. Bu orqali loyihalar samaradorligi 38 foizga oshiriladi.
Mahallalar ham kompleks yangilanadi
Taqdimotda Yashnobod tumanidagi to'rtta mahallani kompleks yangilash loyihasi ham ko'rsatildi. “15 daqiqalik mahalla” tamoyili asosida 2027-yilda 100 ta, 2030-yilga qadar 400 ta mahalla yangilanadi, 130 mingta yangi ish o'rni yaratiladi. Shuningdek, xususiy ta'lim markazlarining davlat maktablari bilan hamkorligi yo'lga qo'yiladi. Poytaxtdagi ta'lim infratuzilmasi Yangi Toshkent tajribasi asosida rivojlantirilmoqda.
