Bosh vazirning birinchi o'rinbosari, ta'lim va ilm-fan vaziri Erkinjon Turdimov oliy ta'lim yo'nalishiga mas'ul rahbarlarning taqdimotlari bilan tanishdi. Rahbarlar tizimdagi mavjud holat, olib borilayotgan islohotlar va oldinda turgan ustuvor vazifalar haqida axborot berdi. Bu haqda vazirlikning rasmiy kanali xabar qildi.
Taqdimotlarda uch asosiy yo'nalish ko'rib chiqildi
Birinchi yo'nalish ta'lim sifati va mehnat bozori bilan bog'liq bo'ldi. Oliygohlarda o'quv dasturlarini ish beruvchilar talabiga moslashtirish, ilm-fan va ishlab chiqarish o'rtasidagi hamkorlikni kuchaytirish zarurligi qayd etildi. Ikkinchi yo'nalish talabalarga yaratilgan sharoitlarga bag'ishlandi. Yoshlarning chuqur bilim olishi, xorijiy tillarni o'rganishi va tanlagan kasbini puxta egallashi uchun munosib muhit kerakligi ta'kidlandi. Nazariy bilimni amaliyotda qo'llay olish hamda o'qishni tamomlagach mutaxassisligi bo'yicha ish topishga ko'maklashish alohida vazifa sifatida belgilandi.
Ilmiy salohiyatni oshirish choralari belgilandi
Uchinchi yo'nalishda oliygohlarning ilmiy qudrati muhokama qilindi. Professor-o'qituvchilar faoliyatini qo'llab-quvvatlash, ilmiy tadqiqotlar natijalarini amaliyotga tatbiq etish va xalqaro hamkorlikni kengaytirish bo'yicha fikr almashildi. Yig'ilishda oliy ta'limni shunchaki diplom beradigan tizim emas, balki yoshlarni mustaqil fikrlaydigan va o'z sohasining yetuk mutaxassisi etib tarbiyalaydigan muhitga aylantirish asosiy maqsad ekani aytildi. Eslatib o'tamiz, Prezident ham universitetlar tayyorlaydigan kadrini aniq belgilab olishi shartligini ta'kidlagan edi. Taqdimotlar yakunida mavjud muammolarni chuqur tahlil qilish, ularning yechimi bo'yicha aniq takliflar ishlab chiqish va har bir vazifani amaliy natija bilan bog'lash topshirildi. Bu vazifalar ijrosi kelgusi davrda oliygohlar faoliyatini baholash mezoniga aylanishi kutilmoqda.
