Prezidentning 2026-yil 9-oktabrdagi PF-217-son farmoni Vazirlar Mahkamasining ijro etuvchi tuzilmasini qayta shakllantirdi. Hujjat bilan hukumat tarkibida 12 shtat birligidan iborat Ta’lim, ilm-fan va sog‘liqni saqlash masalalari kotibiyati tashkil etildi, boshqaruv xodimlarining umumiy soni esa 243 nafarda belgilandi. Farmon 12-oktabrdan kuchga kirdi, uning to’liq matni lex.uz saytida e’lon qilingan.
Hujjat 3-oktabrda boshlangan boshqaruv islohotining navbatdagi bosqichi bo‘ldi. O‘shanda Maktabgacha va maktab ta’limi hamda Oliy ta’lim, fan va innovatsiyalar vazirliklari negizida yagona Ta’lim va ilm-fan vazirligi tashkil etilib, unga rahbarlik Erkinjon Turdimovga topshirilgan edi — bu haqda alohida xabar berilgan. Yangi kotibiyat va uning vakolatlari haqidagi dastlabki ma’lumot ham saytda yoritilgan edi.
Kotibiyat 12 shtat birligidan iborat bo‘ladi
Farmonga ko‘ra, kotibiyatning beshta shtat birligi Vazirlar Mahkamasining Ijtimoiy rivojlanish masalalari bo‘limi hisobidan shakllantiriladi. Qolgan yettita shtat qayta tashkil etilgan Maktabgacha va maktab ta’limi vazirligi hamda Oliy ta’lim, fan va innovatsiyalar vazirligi shtatlarini maqbullashtirish hisobidan ajratiladi. Ya’ni yangi bo‘linma uchun qo‘shimcha xodim talab qilinmaydi, mavjud shtatlar qayta taqsimlanadi.
Vazirga biriktirilgan organlar va hamkorlik yo‘nalishlari
Bosh vazirning birinchi o‘rinbosari — ta’lim va ilm-fan vaziriga Ta’lim va ilm-fan vazirligi, Sog‘liqni saqlash vazirligi hamda ular tizimidagi tegishli agentlik, qo‘mita va inspeksiyalar biriktirildi. Ro‘yxatdan Fanlar akademiyasi ham joy olgan. Muayyan vazifalar doirasida Ichki ishlar vazirligi va Yoshlar ishlari agentligi ham biriktirilgan.
Ichki ishlar vazirligi ta’lim muassasalarida, o‘quvchi va talabalar orasida giyohvandlik vositalari hamda psixotrop moddalar tarqalishining, tazyiq va zo‘ravonlik jinoyatlarining oldini olish masalalari bo‘yicha ishlaydi. Yoshlar ishlari agentligi esa o‘quvchi va talabalarning zamonaviy bilim va kasb-hunar egallash imkoniyatlarini kengaytirish, ularni vatanga sadoqat, milliy va umuminsoniy qadriyatlarga hurmat ruhida tarbiyalash yo‘nalishida ishtirok etadi.
Farmonda Davlat xavfsizlik xizmati va Milliy gvardiya bilan o‘zaro hamkorlik yo‘nalishlari ham belgilangan. Ular o‘quvchi va talabalarni zararli oqimlar ta’siridan himoya qilish, vatanparvarlik va sog‘lom turmush tarzini targ‘ib etish kabi masalalarni qamrab oladi.
Hukumat tuzilmasidagi boshqa o‘zgarishlar
Vazirlar Mahkamasiga ikki hafta ichida yangi lavozimning funksional vazifalari hamda kotibiyat to’g‘risidagi nizomni tasdiqlovchi qaror qabul qilish topshirildi. Tuzilmadagi Ijtimoiy rivojlanish masalalari bo‘limi Madaniyat va sport masalalari bo‘limi deb qayta nomlanadi.
Birinchi o‘rinbosar o‘z vakolati doirasida respublika ijro etuvchi hokimiyat organlari rahbarlari, Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlarining ta’lim, ilm-fan va sog‘liqni saqlashga oid vazifalari bajarilishiga umumiy rahbarlik qiladi. Ilgari bu yo‘nalishlar alohida idoralar orqali taqsimlangan edi, endi ular yagona rahbarlik ostida muvofiqlashtiriladi.
Hujjat kuchga kirgani bilan hukumat tuzilmasidagi yangi lavozim va kotibiyat amalda ishlay boshlaydi; nizom tasdiqlangach, ularning aniq funksiyalari ham ma’lum bo‘ladi.
