Xivada Xitoyning Lyaoning pedagogika universiteti filiali ishga tushdi va 2026/2027-o‘quv yilidan talaba qabul qila boshladi. Bu haqda vazirlikning rasmiy Telegram kanalida xabar berildi. Yangi ta’lim majmuasi Urganch davlat universiteti va Xitoyning Lyaoning pedagogika universiteti hamkorligida amalga oshirilgan loyiha doirasida barpo etilgan.
2026-yil uchun qabul kvotasi 160 nafar etib belgilangan. Kelgusida yillik qabulni 500 nafarga, talabalar sonini esa 2 ming nafarga yetkazish rejalashtirilgan. Filialning ta’sis shartlari va grant imtiyozlari haqida avvalroq alohida xabar berilgan edi.
Bakalavriat va magistratura yo‘nalishlari
Bakalavriatda “Xalqaro xitoy tili ta’limi”, “Turizm boshqaruvi”, “Xalqaro biznes” va “Sun’iy intellekt” yo‘nalishlari bo‘yicha kadrlar tayyorlanadi. Magistratura bosqichida “Xitoy tili va madaniyatini o‘qitish metodikasi”, “Ta’lim boshqaruvi” hamda “Sun’iy intellekt va ta’lim texnologiyalari” yo‘nalishlari ochilgan. Ta’lim o‘zbek, xitoy va ingliz tillarida, kunduzgi va masofaviy shakllarda olib boriladi.
Ta’lim majmuasining imkoniyatlari
Majmua 4,57 gektar maydonda joylashgan. Unda 560 o‘rinli o‘quv bloklari, kutubxona, sport zali, 200 o‘rinli madaniyat saroyi va 118 o‘rinli oshxona mavjud. Ikkinchi to‘rt qavatli binoda 628 o‘rinli auditoriyalar hamda 224 o‘rinli talabalar turar joyi tashkil etilgan. Prezident idorasi ma’lumotiga ko‘ra, qurish va jihozlash ishlariga davlat budjetidan 140 milliard so‘m ajratilgan, bu yerda 120 ta yangi ish o‘rni yaratilgan.
Hudud iqtisodiyoti uchun kadrlar tayyorlanadi
Filial diplomi O‘zbekistonda to‘g‘ridan-to‘g‘ri tan olinadi. Iqtidorli bitiruvchilar Xitoyning yetakchi oliy ta’lim muassasalarida grant asosida o‘qishni davom ettirish va nufuzli tashkilotlarda stajirovka o‘tash imkoniyatiga ega bo‘ladi.
Xorazm viloyatida xitoylik investorlar ishtirokida umumiy qiymati 2 milliard 343 million dollarlik 38 ta yirik loyiha amalga oshirilmoqda. Ularda zamonaviy texnologiyalar va xitoy tilini yaxshi biladigan mutaxassislarga talab yuqori; filial qoshidagi Konfutsiy instituti ana shu ehtiyojga mos kadrlar tayyorlashga xizmat qiladi.
