O‘zbekiston ta’lim tizimida boshqaruv islohoti davom etmoqda. 3-oktabr kuni oliy ta’lim, fan va innovatsiyalar vazirligi hamda maktabgacha va maktab ta’limi vazirligi negizida yagona Ta’lim va ilm-fan vazirligi tashkil etilgan edi. Bugun, 9-oktabr kuni bu jarayonga yana bir bo‘g‘in qo‘shildi: Prezident Administratsiyasi tarkibida Ta’lim, ilm-fan va sog‘liqni saqlash masalalari kotibiyati tuzildi. Shu kuni Erkinjon Turdimov Bosh vazirning birinchi o‘rinbosari – ta’lim va ilm-fan vaziri lavozimiga tayinlandi.
Yangi kotibiyat uch sohani – ta’lim, ilm-fan va sog‘liqni saqlashni – bir markazda jamlaydi. Prezidentning tegishli farmoni bilan bu yo‘nalishlar bo‘yicha umumiy rahbarlik va muvofiqlashtirish vazifasi yagona tuzilmaga birlashtirildi.
Vazirlar Mahkamasi tuzilmasidagi yangi lavozim
Farmonga ko‘ra, Vazirlar Mahkamasining ijro etuvchi tuzilmasiga Bosh vazirning birinchi o‘rinbosari – ta’lim va ilm-fan vaziri lavozimi kiritildi. Bu qadam mazkur lavozimni hukumat ierarxiyasida alohida o‘ringa qo‘yadi. Turdimovning tayinlanishi haqida avvalroq alohida xabar berilgan edi.
Idoralar va hududlar ustidan muvofiqlashtirish
Yangi lavozim egasi respublika ijro etuvchi hokimiyat organlari – vazirliklar, qo‘mitalar, agentliklar va inspeksiyalar rahbarlarining ta’lim, ilm-fan va sog‘liqni saqlash sohasidagi faoliyatiga umumiy rahbarlik qiladi. Ularni muvofiqlashtirish ham uning vakolatiga kiradi.
Xuddi shu vakolat Qoraqalpog‘iston Respublikasi Vazirlar Kengashi Raisi, viloyatlar va Toshkent shahar hokimlariga nisbatan ham belgilangan. Ya’ni hududiy hokimiyat organlarining mazkur sohalardagi ishi endi vazir bilan kelishilgan yo‘nalishda yuritilishi ko‘zda tutilgan.
Bunday boshqaruv modeli joriy etilishidan oldin ta’lim va fan sohasi ikki alohida vazirlik tomonidan idora qilinardi. Vazirliklarni birlashtirish to’g‘risidagi xabar saytda chop etilgan.
Ijro nazorati Mirziyoyeva zimmasida
Farmon bilan ushbu yo‘nalishlar ijrosini tashkil qilish va nazorat qilish Prezident Administratsiyasi Rahbari Saida Mirziyoyeva zimmasiga yuklandi. Demak, kotibiyat faoliyati bevosita Administratsiya rahbari nazoratida bo‘ladi.
Uch soha uchun yagona boshqaruv
Kotibiyat ta’lim, ilm-fan va sog‘liqni saqlash yo‘nalishlarini bitta tuzilma doirasida birlashtiradi. Respublika va hududlar miqyosidagi idoralar o‘rtasidagi aloqani ham shu kotibiyat muvofiqlashtiradi.
Kotibiyatning tashkil etilishi ta’lim va ilm-fan boshqaruvini yagona mantiqqa solishga qaratilgan. Endi vazirliklar, agentliklar va hududiy hokimiyat organlari o‘rtasidagi ish shu tuzilma orqali yo‘naltiriladi. Mazkur qarorlar Prezident farmonlari bilan rasmiylashtirildi: 3-oktabrdagi farmon vazirliklarni birlashtirgan bo‘lsa, 9-oktabrdagi hujjat yangi lavozim va kotibiyat masalasini tartibga soldi.
Turdimov shu munosabat bilan Sirdaryo viloyati hokimi lavozimidan ozod etilgani ham ma’lum qilindi. Ungacha u 2025-yil yanvardan Sirdaryo viloyati hokimi sifatida ishlab kelgan edi.
