Maktabgacha ta’limdan ilm-fangacha bo‘lgan butun soha endi yagona idora qo‘lida jamlandi. Shu yo‘nalishdagi islohotlarni jadallashtirish uchun Prezident Shavkat Mirziyoyevga Ta’lim va ilm-fan vazirligi faoliyatini tashkil etish bo‘yicha takliflar ko‘rsatildi. Taqdimotda boshqaruvning amaldagi holati va keyingi qadamlar muhokama qilindi.
Asosiy e’tibor boshqaruv samaradorligiga qaratildi. Vazirlikdan sohani joylardagi haqiqiy holatga tayanib boshqarish, bir xil vazifalarni takrorlovchi bo‘g‘inlarni qisqartirish va hududiy bo‘linmalar mas’uliyatini oshirish talab qilinmoqda.
Yangi vazirlik oldiga qo‘yilgan asosiy talablar
Taqdimotda boshqaruvni raqamlashtirish va tahliliy salohiyatni kuchaytirish alohida tilga olindi. Qarorlar endi ishonchli ma’lumotlarga tayanib qabul qilinishi kerak. Shuningdek, ta’lim mazmunini mehnat bozori talablariga moslashtirish, sohada raqobatni rivojlantirish va xususiy sektor ishtirokini kengaytirish zarurligi aytildi.
Vazirlikning jamoatchilik oldidagi hisobdorligini oshirish ham ustuvor yo‘nalishlar qatorida ko‘rib chiqildi. Bu esa idora faoliyatining ochiqligini ta’minlashga qaratilgan.
Maktabgacha va maktab ta’limidagi takliflar
Maktabgacha ta’lim bo‘g‘inida bolani har tomonlama rivojlantirish, o‘quv dasturlari va metodikalarni yangilash hamda tarbiyachilar malakasini oshirish taklif etildi. Bolalarning qiziqishi va qobiliyatlarini erta aniqlash, ta’lim muassasalarida zamonaviy sharoit yaratish masalalari ham muhokama qilindi.
Maktab ta’limida darsliklarni yangilash, o‘quvchilarning bilim va amaliy ko‘nikmalarini izchil rivojlantirish, baholash tizimini takomillashtirish ko‘rib chiqildi. Pedagoglarga metodik yordam ko‘rsatishda sun’iy intellekt imkoniyatlaridan foydalanish, ayrim maktablarda ingliz tilida ta’lim berish tajribasini yo‘lga qo‘yish va xususiy sektor ishtirokini kengaytirish taklif qilindi.
Kasbiy va oliy ta’lim hamda ilm-fan yo‘nalishi
Kasbiy ta’limda yoshlarning qiziqishini erta aniqlash, texnikumlar o‘quv dasturlarini mehnat bozori talablariga moslashtirish va ularning moddiy bazasini mustahkamlashga alohida e’tibor qaratildi. Korxonalar bilan hamkorlikda dual ta’limni kengaytirish, xalqaro dasturlar va zamonaviy o‘quv materiallarini joriy etish masalalari ko‘rib chiqildi.
Oliy ta’limda universitetlar mustaqilligini kengaytirish, boshqaruv sifatini oshirish va rahbarlarning natija uchun mas’uliyatini kuchaytirish taklif qilindi. Yetakchi xorijiy oliygohlar bilan hamkorlikni rivojlantirish, ta’limni ishlab chiqarish bilan yaqinlashtirish va talabalarning amaliy tayyorgarligini kuchaytirish muhokama qilindi.
Ilm-fan sohasida ilmiy klasterlarni rivojlantirish, universitetlar, laboratoriyalar va korxonalar o‘rtasidagi hamkorlikni mustahkamlash tilga olindi. Ilmiy ishlanmalarni amaliyotga joriy etish va ular asosida yangi mahsulot hamda korxonalar yaratish bo‘yicha takliflar bildirildi.
Bog‘chadan oliygohgacha yagona vertikal
Prezident ta’limning bog‘chadan oliygohgacha bo‘lgan barcha bosqichlari yagona vertikal sifatida ishlashi, ayniqsa maktab va universitet o‘rtasidagi uzviylik mustahkamlanishi zarurligini ta’kidladi. Mutasaddilarga bildirilgan takliflarni puxta ishlab chiqish topshirildi. Yig‘ilish tafsilotlari rasmiy ravishda president.uz saytida e’lon qilindi.
Eslatib o‘tamiz, 3-oktabr kuni maktabgacha va maktab ta’limi hamda oliy ta’lim, fan va innovatsiyalar vazirliklari negizida yagona Ta’lim va ilm-fan vazirligi tashkil etilgani haqida xabar berilgan edi.
