Buyuk Britaniya hukumati voyaga yetmaganlarni raqamli muhitning salbiy ta'siridan himoya qilishga qaratilgan navbatdagi tashabbusni e'lon qildi. Otgan oy 16 yoshgacha bo'lgan bolalar uchun ijtimoiy tarmoqlardan foydalanishni taqiqlash rejasi taqdim etilgan bo'lsa, endi 16-17 yoshli osmirlar uchun tungi foydalanishni cheklash taklif qilinmoqda.
Leyboristlar hukumati 15-iyul kuni e'lon qilgan taklifga ko'ra, Instagram, TikTok va YouTube kabi platformalarda 16-17 yoshli foydalanuvchilar uchun soat 00:00 dan 06:00 gacha davom etadigan 6 soatlik tungi cheklov sukut bo'yicha faollashtiriladi. Shu bilan birga, foydalanuvchilar istasa ushbu cheklovni o'chirib qo'yish imkoniyatiga ham ega bo'ladi.
Taklifga ko'ra, ushbu yosh toifasi uchun videolarning avtomatik ijro etilishi (autoplay) hamda cheksiz skroll (infinite scrolling) kabi foydalanuvchini uzoq vaqt platformada ushlab turuvchi funksiyalar ham sukut bo'yicha o'chirib qo'yiladi. Hukumat bu orqali o'smirlarning uyqu sifatini yaxshilash va diqqatini jamlashga ko'maklashishni maqsad qilgan.
Mazkur tashabbus joriy yil iyun oyida o'sha paytdagi Bosh vazir Keyr Starmer tomonidan e'lon qilingan rejaning davomi hisoblanadi. Unga ko'ra, 2027-yildan boshlab 16 yoshgacha bo'lgan bolalarning ijtimoiy tarmoqlardan foydalanishi to'liq taqiqlanishi rejalashtirilgan.
Agar 16 yoshgacha bo'lgan bolalar uchun qat'iy taqiq joriy etilishi ko'zda tutilgan bo'lsa, 16-17 yoshdagi o'smirlarga nisbatan hukumat nisbatan yumshoqroq yondashuvni tanlagan.
Dunyo bo'ylab tendensiya
Buyuk Britaniyaning bu tashabbusi yoshlarning ijtimoiy tarmoqlardan foydalanishini cheklash bo'yicha dunyo bo'ylab kuchayib borayotgan tendensiyaning bir qismidir. Avstraliya o'tgan yil dekabr oyida 16 yoshgacha bo'lgan bolalar uchun ijtimoiy tarmoqlardan foydalanishni taqiqlagan dunyodagi ilk davlatga aylangan edi. Biroq keyinchalik ko'plab o'smirlar ushbu cheklovlarni osonlik bilan chetlab o'tayotgani sababli hukumat qoidalarni yanada kuchaytirish imkoniyatlarini ko'rib chiqmoqda.
Mazkur taqiq 10-dekabr kuni kuchga kirgan bo'lib, Avstraliya bolalarning ijtimoiy tarmoqlarga kirishini cheklashga urinayotgan boshqa davlatlar uchun o'ziga xos tajriba maydoniga aylangan.
Tanqid va qo'llab-quvvatlash
Buyuk Britaniyaning Onlayn xavfsizlik bo'yicha vaziri Kanishka Narayan tungi cheklovning ixtiyoriy ekanini himoya qilib, o'smirlar uni shunchaki o'chirib qo'yadi degan tanqidlarni rad etdi. U hukumat katta yoshdagi o'smirlar uchun qat'iy taqiqlar emas, balki ularni voyaga yetish jarayoniga bosqichma-bosqich tayyorlashni maqsad qilganini aytdi.
Vazirning so'zlariga ko'ra: "Biz o'smirlarga mustaqil tanlov qilish imkonini bermoqchimiz. Men barcha o'smirlar bu cheklovni darhol o'chirib qo'yadi deb hisoblash orqali ularga nisbatan hurmatsizlik qilgan bo'lardim."
Konservativ partiyaning ta'lim masalalari bo'yicha vakili Laura Trott ushbu rejani mantiqsiz deb baholagan. Buyuk Britaniyaning bolalarni zo'ravonlikdan himoya qilish bo'yicha yirik nodavlat tashkiloti NSPCC esa tashabbusni ijobiy baholadi. Biroq tashkilot rahbari Kris Shervud hukumat bundan ham qat'iyroq choralarni ko'rmasa, bu siyosat muammoni faqat vaqtincha yumshatishini ta'kidlagan.
Ta'lim va texnologiyalar sohasidagi eng muhim yangiliklarni InfoEdu.uz orqali kuzatib boring.
Reklama
Izohlar (0)
Izoh yozish uchun tizimga kiring.