Koreyada bolalar ijtimoiy tarmoqsiz qolishi mumkin

Farzandingiz qo'lidagi telefonda soatlab ijtimoiy tarmoqlarni varaqlayotganini ko'rib, ichingizda nimadir siqiladimi? Janubiy Koreyada bu endi nafaqat ota-onalarning bosh og'rig'i, balki davlat miqyosidagi masalaga aylanmoqda. Koreya OAV va Aloqa komissiyasi raisi Kim Jong-chol 14 yoshgacha bo'lgan bolalarning ijtimoiy tarmoqlarda akkaunt ochishini cheklash taklifini ilgari surdi.

Yonhap axborot agentligi xabariga ko'ra, bu tashabbus Cheong Va Deda o'tkazilgan siyosiy brifingda e'lon qilindi. Kim Jong-cholning so'zlariga ko'ra, o'smirlarning ijtimoiy tarmoqlardan me'yoridan ortiq foydalanishi bugungi kunda butun dunyo miqyosidagi muammoga aylangan.

Ikki bosqichli cheklov

Koreya hukumati ikki yosh guruhi uchun alohida choralar ko'rmoqchi:

• 14 yoshgacha — ijtimoiy tarmoqlarda akkaunt ochish butunlay cheklanadi;
• 14-19 yosh — platformalardagi qaramlikni kuchaytiruvchi algoritmlar va dizayn elementlari (masalan, cheksiz skroll, avtomatik videoni davom ettirish) tartibga solinadi.

Hozirda mazkur masala yuzasidan Janubiy Koreya Milliy Assambleyasiga yettita qonun loyihasi kiritilgan. JSST ham maktablarda mobil telefonlardan foydalanishni cheklash zarurligini ta'kidlagan edi.

"Shutdown Law" sabog'i

Qizig'i shundaki, Kim Jong-chol bunday cheklovlarni joriy etishda ehtiyotkorlik zarurligini alohida ta'kidladi. U bunga misol sifatida 2011-yilda qabul qilingan va 16 yoshgacha bo'lgan o'smirlarning tungi vaqtda onlayn o'yinlardan foydalanishini taqiqlagan mashhur "Shutdown Law"ni keltirdi. Bu qonun fuqarolarning asosiy huquqlarini cheklagani va o'yin sanoatiga jiddiy zarar yetkazgani sababli 2022-yilda bekor qilingan edi.

Komissiya raisining bu ogohlantirishi shuni anglatadiki, Koreya hukumatori endi xuddi shu xatoni takrorlamaslikka harakat qilmoqda — bolalarni himoya qilish bilan ularning raqamli huquqlarini cheklash o'rtasidagi nozik muvozanatni topish kerak.

Dunyo miqyosidagi tendensiya

Janubiy Koreyaning bu tashabbusi yakka holda emas. So'nggi yillarda bir nechta davlat va mintaqalar shu yo'nalishda harakat qilmoqda:

• Avstraliya — 16 yoshgacha bo'lgan bolalar uchun ijtimoiy tarmoqlarda akkaunt ochishni taqiqlagan dunyodagi birinchi davlat;
• Yevropa Ittifoqi — yoz mavsumidan so'ng bolalarning ijtimoiy tarmoqlarga kirishini cheklovchi qonunchilik tashabbusini taqdim etishini ma'lum qilgan.

InfoEdu.uz jurnalistlari dunyo bo'ylab ta'lim va bolalar xavfsizligiga oid muhim o'zgarishlarni kuzatib boradi.