Alisher Qodirov: Ta’limga ajratilgan mablag‘ natija bermayapti

Ta’lim tizimidagi mablag‘lar samaradorligi masalasi

Oliy Majlis Qonunchilik palatasining navbatdagi majlisida 2024-yil uchun Davlat byudjeti loyihasi qizg‘in muhokama qilindi. Muhokamalar davomida O‘zMTDP fraksiyasi rahbari Alisher Qodirov ta’lim-tarbiya sohasiga alohida to‘xtalib, tizimga ajratilayotgan ulkan mablag‘lar kutilgan natijalarni bermayotganini ta’kidladi.

O‘qituvchilar oyligi va kutilayotgan natijalar

Sohaga yo‘naltirilayotgan mablag‘lar qariyb 3 barobar oshirilgani quvonarli hol, biroq ularning samaradorligi pastligicha qolmoqda. Ma’lumotlarga ko‘ra, o‘tgan yili oliygohlar kirish ballari tahlili shuni ko‘rsatdiki, abituriyentlarning qariyb 50 foizi hatto minimal o‘tish ballarini ham to‘play olmagan.

Pedagoglar malakasi va zamonaviy talablar

Bugungi kunda 500 mingga yaqin o‘qituvchilarning ish haqi uchun 35 trillion so‘m mablag‘ ajratilmoqda. Alisher Qodirovning ta’kidlashicha, maktablarda 10-15 foiz zarurat bo‘lmagan o‘qituvchilar faoliyat yuritmoqda. Shu sababli, pedagog kadrlar attestatsiyasi jarayonlarini kuchaytirish va zamon talablari asosida ishni baholash tizimini yaratish lozim.

Maktabgacha ta’lim tizimidagi islohotlar

Deputat maktabgacha ta’lim tashkilotlari (MTT) masalasiga ham to‘xtalib o‘tdi. Hozirda bog‘chalarda oliy ma’lumotli tarbiyachilar ulushi atigi 25-30 foizni tashkil etmoqda. Soha samaradorligini oshirish uchun quyidagi choralar taklif etildi:

• 35 trillion so‘mlik mablag‘ning bir qismini MTT tizimiga yo‘naltirish;
• Bog‘cha tarbiyachilarining oylik maoshlarini oshirish;
• Jahon standartlariga muvofiq, bitta tarbiyachiga 10-15 nafar bolani biriktirish tizimiga o‘tish.

Zamon tezlashgani bois, pedagoglar ham internet imkoniyatlaridan foydalanayotgan o‘quvchilardan ortda qolmasligi, doimiy ravishda o‘z ustida ishlashi shartligi qayd etildi.