Lotin yozuviga asoslangan o'zbek alifbosining takomillashtirilgan shakli Oliy Majlis Senatining 19-yalpi majlisida ma'qullandi. Qonun bilan alifbo 26 harf va 3 harf birikmasi o'rniga 28 harf va 1 tutuq belgisidan tashkil topadi — bu haqda Senat saytida ma'lum qilindi.
Takomillashtirilgan alifbo loyihasida amalda ikki belgi bilan yoziladigan to'rtta harf bitta harfga birlashtirilgan. Ya'ni apostrof bilan yoziladigan G' va O', shuningdek harf birikmasi hisoblangan Sh va Ch alohida harflar bilan ifodalanadi.
Alifbodagi yangi harflar
Reklama
| Amaldagi yozuv | Yangi yozuv |
|---|---|
| G' g' | Ğ ğ |
| O' o' | Ö ö |
| Sh sh | Ş ş |
| Ch ch | Ç ç |
Loyihada har bir harfning bosma va yozma (qo'lyozma) shakli hamda talaffuzi ko'rsatilgan.
Yangi alifbo tarkibi
| Tartib raqami | Harf | Talaffuzi |
|---|---|---|
| 1 | A a | a |
| 2 | B b | be |
| 3 | D d | de |
| 4 | E e | e |
| 5 | F f | fe |
| 6 | G g | ge |
| 7 | Ğ ğ | ğe |
| 8 | H h | he |
| 9 | I i | i |
| 10 | J j | je |
| 11 | K k | ke |
| 12 | L l | le |
| 13 | M m | me |
| 14 | N n | ne |
| 15 | O o | o |
| 16 | Ö ö | ö |
| 17 | P p | pe |
| 18 | Q q | qe |
| 19 | R r | re |
| 20 | S s | se |
| 21 | Ş ş | şe |
| 22 | Ç ç | çe |
| 23 | T t | te |
| 24 | U u | u |
| 25 | V v | ve |
| 26 | X x | xe |
| 27 | Y y | ye |
| 28 | Z z | ze |
| 29 | ' | Tutuq belgisi |
O'tish davrida eski hujjatlar va belgilar
Qonun kuchga kirguniga qadar amaldagi alifbo asosida rasmiylashtirilgan hujjatlar, milliy valyuta va qimmatli qog'ozlarning muomalada bo'lishiga to'sqinlik qilinmaydi. Davlat organlari va tashkilotlarining ayrim ramziy belgilari, peshlavha va ko'rsatkichlaridan esa ular yaroqsiz holatga kelguniga qadar yoki belgilangan muddatgacha foydalanishga ruxsat beriladi.
Senatorlarning qayd etishicha, qonunning qabul qilinishi lotin yozuviga asoslangan alifbo va imlo qoidalarini takomillashtirishga, davlat tilidan foydalanish imkoniyatlarini kengaytirishga hamda o'zbek tilini raqamlashtirish jarayonlarini rivojlantirishga xizmat qiladi.
Yangi alifbo maktablarga bosqichma-bosqich kirib boradi: 1-sinf darsliklari 2027-yildan yangi alifboda chop etiladi, qolgan sinflarda darsliklar o'z yangilanish muddatida almashtiriladi, to'liq o'tish 2031-yilga qadar yakunlanadi.
Izohlar (0)
Izoh yozish uchun tizimga kiring.