Prezident Administratsiyasi — davlat boshqaruvining markaziy tuzilmalaridan biri. Shunga qaramay, uning faoliyati shu kungacha alohida qonun bilan tartibga solinmagan edi. Endi bu bo‘shliq yopildi: Shavkat Mirziyoyev “O‘zbekiston Respublikasi Prezidenti Administratsiyasi to‘g‘risida”gi Konstitutsiyaviy qonunni imzoladi.
Administratsiya Prezident faoliyati va konstitutsiyaviy vakolatlarini tashkiliy, huquqiy hamda tahliliy jihatdan ta’minlaydigan yagona konstitutsiyaviy institut hisoblanadi. Ilgari esa davlat organlari bilan munosabatlarda uning faoliyatini qonun darajasida tartibga solish yo‘lga qo‘yilmagan edi. Xalqaro amaliyotda bunday institutning huquqiy maqomi qonun bilan belgilanishi Prezidentlik boshqaruvining institutsional standarti hisoblanadi.
Qonun qanday masalalarni tartibga soladi?
Reklama
Yangi qonun 4 bob va 34 moddadan iborat bo‘lib, Administratsiyaning amaldagi vakolatlari doirasida Prezident faoliyatini ta’minlashning konstitutsiyaviy mexanizmlarini huquqiy jihatdan rasmiylashtirdi.
Hujjatga ko‘ra, Administratsiya Prezident vakolatlari amalga oshirilishini tashkiliy, huquqiy va tahliliy jihatdan ta’minlaydigan davlat organi sifatida belgilandi. Uni Prezident shakllantiradi, u Prezident belgilagan asosiy yo‘nalishlarda faoliyat yuritadi hamda Prezidentga bo‘ysunadi va hisobdor bo‘ladi.
Administratsiyaning asosiy vazifalari
Qonunda Administratsiyaning asosiy vazifalari ham aniq belgilab qo‘yildi:
- Prezidentning konstitutsiyaviy vakolatlarini amalga oshirilishini tashkiliy, huquqiy va tahliliy ta’minlash;
- farmon, qaror va farmoyishlar loyihalarini hamda topshiriqlarni tayyorlash, ularning ijrosini tashkil etish va nazorat qilish;
- Prezidentning mamlakatni ijtimoiy-iqtisodiy va ijtimoiy-siyosiy rivojlantirishga oid yangi tashabbuslarini ishlab chiqish;
- aholi va tadbirkorlar bilan ochiq hamda to‘g‘ridan-to‘g‘ri muloqotlarni tashkil etish va ularni qiynayotgan masalalarga yechim ishlab chiqish;
- qonunlarni imzoga yoki qaytarishga tayyorlash;
- Prezidentning Oliy Majlisga murojaatnomasini tashkil etish;
- Prezidentga bevosita bo‘ysunuvchi davlat organlari va tashkilotlari faoliyatini muvofiqlashtirish.
Yana nimalar mustahkamlandi?
Qonunda Administratsiya rahbarining huquqiy maqomi va vazifalari, mansabdor hamda boshqaruv shaxslarini lavozimga tayinlash va ozod etish tartibi belgilandi. Shuningdek, Prezident huzuridagi Xavfsizlik kengashi faoliyatini tashkil etishning qonuniy asoslari yaratildi.
Administratsiya Prezident faoliyatini tashkil etish doirasida parlament, Hukumat, vazirlik va idoralar, mahalliy hokimliklar, sud hokimiyati organlari bilan hamkorlik qiladi. Prezidentga bevosita bo‘ysunuvchi davlat organlari faoliyatini muvofiqlashtiradi, ularni takomillashtirish bo‘yicha takliflarni Prezidentga kiritadi. Xodimlar uchun esa ijtimoiy, iqtisodiy va huquqiy himoya choralari nazarda tutilgan.
Davlat organlari faoliyatini qonuniy tartibga solish bo‘yicha islohotlar davom etmoqda — avvalroq Oliy attestatsiya komissiyasi Fanlar akademiyasi tizimiga o‘tkazilgani haqida yozgan edik. InfoEdu.uz orqali ta’limga oid eng muhim yangiliklarni muntazam kuzatib boring.
Izohlar (0)
Izoh yozish uchun tizimga kiring.