Nodavlat oliygohlar uchun davlat tomonidan qanday imkoniyatlar yaratilgan?

Nodavlat oliy ta'lim tashkilotlari bugungi kunda ta'lim tizimining ajralmas qismiga aylandi. Davlat ularning rivojlanishini qonunchilik darajasida mustahkamlab, bir qator imkoniyatlar yaratdi. Quyida asosiy huquqiy asoslar bilan tanishing.

Konstitutsiya va qonun darajasidagi kafolatlar

• Konstitutsiya, 50-modda: davlat uzluksiz ta'lim tizimi, uning har xil turlari va shakllari, davlat va nodavlat ta'lim tashkilotlari rivojlanishini ta'minlaydi;
• Ta'lim to'g'risidagi qonun, 31-modda: davlat ta'lim standartlariga muvofiq xizmat ko'rsatuvchi nodavlat ta'lim tashkilotlari bitiruvchilariga davlat tomonidan tasdiqlangan namunadagi ta'lim to'g'risidagi hujjatlar beriladi.

Talabalar uchun qanday imtiyozlar bor?

• Ko'chirish huquqi (PQ-200, 03.07.2023): litsenziyasi bekor qilingan ta'lim tashkiloti yoki yopilgan ta'lim dasturida o'qiyotgan talabalarga o'qishni davlat va nodavlat ta'lim tashkilotlarining mos va turdosh yo'nalishlariga ko'chirish huquqi beriladi;
• Davlat granti (PQ-279, 15.06.2022): 2022/2023 o'quv yilidan boshlab xorijiy oliy ta'lim tashkilotlari va ularning filiallari hamda nodavlat OTMlarda davlat granti asosida kadrlar tayyorlash bo'yicha 1 000 ta o'rin ajratiladi;
• 1 200 ta grant: prezident farmoyishiga ko'ra, joriy yilda nodavlat oliy ta'lim tashkilotlari uchun 1 200 ta davlat granti ajratiladi;
• Dars berish huquqi (VM 646, 15.10.2021): pedagogika yo'nalishlarida kunduzgi, kechki, sirtqi bo'limlarning 3-kursida tahsil olayotgan talabalarga maktablarda dars berish huquqi berilgan;
• Ta'lim krediti (PQ-323, 18.07.2022): kunduzgi ta'lim shaklida o'qiyotgan xotin-qizlarga imtiyozli foizsiz ta'lim krediti beriladi.

Ya'ni nodavlat oliygohlarda o'qish — davlat tomonidan tan olinadigan, kafolatlangan va qo'llab-quvvatlanadigan ta'lim yo'li hisoblanadi. Avvalroq xorijiy va nodavlat OTMlar uchun davlat grantlari haqida yozgan edik. InfoEdu.uz oliy ta'lim qonunchiligidagi o'zgarishlarni yoritishda davom etadi.