Toshkent shahrida Rossiya oliy ta'lim muassasasida ikki yil tahsil olgani haqida soxta hujjatlar tayyorlab, fuqaroni poytaxtdagi xususiy oliygohning 3-bosqichiga o'qishga kiritib qo'yishni va'da qilgan shaxslar ushlandi. Mazkur noqonuniy harakat Davlat xavfsizlik xizmati, Bosh prokuratura huzuridagi Departament hamda Ichki ishlar vazirligi xodimlari hamkorligida o'tkazilgan tezkor tadbirda fosh etildi.
Soxta hujjatlar orqali uchinchi bosqichga o'tkazish rejalashtirilgan
Aniqlanishicha, 1997-yilda Jizzax viloyatining G'allaorol tumanida tug'ilgan va hozirda Toshkent shahrida yashovchi shaxs o'z tanishlari imkoniyatidan foydalanishni va'da qilgan. U fuqaroning Rossiya oliygohida ikkinchi kursni yakunlagani to'g'risida soxta hujjatlarni rasmiylashtirib, poytaxtdagi xususiy oliygohning 3-bosqichiga o'qishga kiritib qo'yish evaziga 8 ming AQSH dollari talab qilgan.
Tezkor tadbirda noqonuniy pul olgan shaxslar qolga olindi
Tezkor tadbir davomida gumonlanuvchi shaxs kelishilgan summadan 7 500 AQSH dollarini ashyoviy dalillar bilan olgan vaqtida ushlandi. Surishtiruv va tezkor harakatlar davom ettirilib, mazkur pul mablag'ini undan qabul qilib olgan 1993-yilda tug'ilgan boshqa bir fuqaro ham qo'lga olindi.
Tergovga qadar tekshiruv jarayonida ushbu noqonuniy sxemaga Yakkasaroy tumani IIO FMB inspektor-psixologi ham aloqador ekani ma'lum bo'ldi. Inspektor 7 500 AQSH dollarini olgan vaqtida uning noqonuniy harakatlariga chek qo'yildi.
Tergov harakatlari va huquqiy oqibatlar
Hozirda ushbu holat yuzasidan barcha ishtirokchilarga nisbatan jinoyat ishi qo'zg'atilib, tergov harakatlari olib borilmoqda. Davlat xavfsizlik xizmati fuqarolarni ta'lim tizimidagi bu kabi qonunbuzarliklarga duch kelganda 1520 qisqa raqamiga murojaat qilishga chaqirdi hamda xabar bergan shaxslarning ma'lumotlari sir saqlanishi kafolatlanishini bildirdi.
Izohlar (0)
Izoh yozish uchun tizimga kiring.
Hozircha izohlar yo‘q.
Birinchi bo‘lib izoh qoldiring