30-sentabr kuni “Yangi O‘zbekiston” universitetida o‘qituvchi va murabbiylar bilan uchrashuv bo‘lib o‘tdi. Unda Prezident Shavkat Mirziyoyev xususiy maktablar uchun qo‘shimcha imtiyozlar joriy etilishini ma’lum qildi. Sabab — o‘quvchi oqimi: joriy yilda 1-sinfga 800 ming bola qabul qilindi, bu o‘tgan yilga nisbatan 10 foiz ko‘p; tahlillarga ko‘ra, 2030-yilga borib bu raqam 1 millionga yetadi. Investitsiya dasturlari doirasida har yili 180-200 ming o‘quvchi o‘rni yaratilmoqda.
Kredit va subsidiya shartlari
O‘quv yuklamasi yuqori bo‘lgan 52 tumanda xususiy sektor ulushini oshirish uchun yangi moliyaviy mexanizmlar joriy etiladi:
- Xususiy maktab ochish uchun 7 yil muddatga 10 foizli imtiyozli kredit beriladi;
- Maktab ochish va jihozlashga kiritilgan mablag‘ning 15 foizi subsidiya sifatida qoplanadi, uning chegarasi 1,5 mlrd so‘m;
- Binoni maktab uchun ijaraga berganlarga yer va mol-mulk solig‘idan imtiyoz beriladi.
Barcha tumanlarda beriladigan imtiyozlar
Quyidagi yengilliklar hududlar kesimida ajratilmaydi — ular mamlakatning barcha tumanlariga tegishli:
- Bo‘sh turgan davlat binolari xususiy maktab uchun 10 yilga bepul ijaraga beriladi;
- Xususiy maktablarning xalqaro akkreditatsiya xarajatining 50 foizi qoplanadi;
- Farzandi xususiy maktabda o‘qiyotgan ota-onalar uchun soliq olinmaydigan daromad chegarasi 3 mln so‘mdan 6 mln so‘mga oshiriladi.
Ota-onalar yiliga 6-7 mln so‘m tejaydi
Daromad solig‘i olinmaydigan chegaraning ikki baravar oshishi oila byudjetiga bevosita ta’sir qiladi: hisob-kitoblarga ko‘ra, ota-onalar yiliga 6-7 mln so‘m tejaydi. Qaytarish avtomatik tizim orqali amalga oshiriladi — soliq idoralari har oy yakunida to‘lovlarni o‘zlari qaytaradi.
Imtiyoz joriy etiladigan 52 tuman
Yangi moliyaviy mexanizmlar quyidagi tuman va shaharlarni qamraydi: Nukus shahri, To‘rtko‘l, Ellikqal’a, Andijon, Asaka, Baliqchi, Buloqboshi, Jalaquduq, Izboskan, Qo‘rg‘ontepa, Marhamat, Oltinko‘l, Paxtaobod, Shahrixon, Sh. Rashidov, Zarbdor, Paxtakor, Qarshi, Nishon, Kasbi, Ko‘kdala, Chiroqchi, Shahrisabz shahri, Yakkabog‘, Navoiy shahri, Zarafshon shahri, Namangan shahri, Kosonsoy, Namangan, Norin, To‘raqo‘rg‘on, Uychi, Bulung‘ur, Jomboy, Samarqand, Urgut, Toyloq, Termiz shahri, Angor, Denov, Termiz, Uzun, Sherobod, Sho‘rchi, Nurafshon shahri, Zangiota, Yangiyo‘l, Buvayda, Uchko‘prik, Xiva shahri, Bektemir, Yangihayot.
Ro‘yxatga o‘quv yuklamasi eng yuqori bo‘lgan hududlar kiritilgan: Qoraqalpog‘iston Respublikasi, Andijon, Jizzax, Qashqadaryo, Navoiy, Namangan, Samarqand, Surxondaryo, Farg‘ona, Xorazm, Toshkent viloyati va Toshkent shahri.
Uchrashuvda pedagoglar uchun Abdulla Avloniy nomidagi davlat mukofotini ta’sis etish taklifi ham ilgari surilgan edi — bu haqda alohida maqola tayyorlaganmiz.
