Xorazm viloyatidagi barcha davlat maktabgacha ta'lim tashkilotlari faoliyati anomal issiq sababli 2026-yil 14–17-iyul kunlari vaqtincha to‘xtatiladi.
Xorazm viloyati Maktabgacha va maktab ta'limi boshqarmasi ma'lum qilishicha, mazkur qaror Sanitariya-epidemiologik osoyishtalik va jamoat salomatligi boshqarmasi tavsiyasi asosida maktabgacha yoshdagi bolalarning hayoti va salomatligini muhofaza qilish maqsadida qabul qilingan.
Bog‘chalar qachondan yana ish boshlaydi?
Reklama
Boshqarma ma'lumotiga ko‘ra, davlat maktabgacha ta'lim tashkilotlari faoliyati 2026-yil 20-iyuldan odatdagi tartibda davom ettiriladi.
Ota-onalarga murojaat qilindi
Boshqarma ota-onalardan ushbu vaqtinchalik cheklovni bolalar salomatligini asrashga qaratilgan profilaktik chora sifatida qabul qilishni hamda issiq kunlarda farzandlarining sog‘lig‘iga alohida e'tibor qaratishni so‘radi.
InfoEdu.uz o‘rganishicha, avvalroq anomal issiq sababli maktablarda o'tkazilishi rejalashtirilgan "Dolzarb 90 kun" tadbirlari ham 1-avgustga qadar to‘xtatilgani haqida xabar berilgan edi.
Shuningdek, Qoraqalpog‘istonning ayrim hududlarida ham bog‘chalar faoliyati vaqtincha to‘xtatilgani ma'lum qilingan.
Izohlar (0)
Izoh yozish uchun tizimga kiring.