“Dolzarb 90 kun” tadbirlari 1-avgustgacha to‘xtatildi

Maktabgacha va maktab ta'limi vazirligi umumiy o‘rta ta'lim maktablarida tashkil etilgan sog‘lomlashtirish maydonchalari faoliyati hamda “Dolzarb 90 kun” loyihasi doirasida rejalashtirilgan tadbirlarni 2026-yil 1-avgustga qadar vaqtincha to‘xtatdi.

Vazirlikning 2026-yil 13-iyuldagi 04-39-2385-sonli xatiga ko‘ra, mazkur cheklov maktabgacha ta'lim tashkilotlarida o‘tkazilishi rejalashtirilgan tadbirlarga ham tatbiq etiladi.

Nima sababdan tadbirlar to‘xtatildi?

Qaror yaqin kunlarda kutilayotgan anomal issiq ob-havo bilan bog‘liq.

Ma'lumotlarga ko‘ra, "O‘zgidromet" prognoziga asosan, havo harorati:

• respublikaning aksariyat hududlarida 41–43 daraja;
• shimoliy, janubiy va cho‘l hududlarida esa 44–46 darajagacha ko‘tarilishi kutilmoqda.

Qaysi tadbirlar vaqtincha to‘xtatiladi?

1-avgustga qadar quyidagilar vaqtincha to‘xtatiladi:

• umumiy o‘rta ta'lim maktablaridagi sog‘lomlashtirish maydonchalari faoliyati;
• maktabgacha ta'lim tashkilotlarida o‘tkaziladigan tadbirlar;
• maktablarda “Dolzarb 90 kun” loyihasi doirasida rejalashtirilgan turli tadbir va loyihalar.

Fuqarolarga qanday tavsiyalar berildi?

Sog‘liqni saqlash vazirligi aholi, ayniqsa xavf guruhiga kiruvchi fuqarolarni issiq ob-havo davrida ehtiyotkorlik choralariga qat'iy amal qilishga chaqirdi.

InfoEdu.uz o‘rganishicha, mazkur cheklov bolalar salomatligini himoya qilish hamda yuqori haroratning salbiy ta'sirini kamaytirish maqsadida joriy etilgan.